Resmı málimetke sáıkes, qazirgi kezde polısııa basqarmasynyń aınalasynda tazalaý jumystary júrgizilip jatyr. 4-6 qańtardaǵy jappaı tártipsizdikter kezinde ǵımarat qatty zaqymdanǵan. Ony qalpyna keltirýge merdiger kompanııa tartyldy. Osy mekemeniń jumysshysy shýly jaryq granatasyn taýyp alǵan.
«Ol qaýipsizdik erejeleriń saqtamaǵan. Granata jarylyp, birneshe saýsaǵyn julyp ketken. Jumysker shuǵyl Taraz qalasy aýrýhanasyna jetkizildi», deıdi Taraz qalalyq polısııa departamentinen.
Vedomstvonyń málimetinshe, ǵımaratty qalpyna keltirý jumystary bastalmas buryn merdiger kompanııalar men qyzmetkerlerge qarý-jaraq, oq-dári jáne arnaıy quraldar tabylǵan boıda kezekshi polıseılerge habar berý qajettigi týraly eskertilgen.
Qazirgi kezde Qylmystyq kodekstiń 156-baby, 2-bóligi boıynsha tergeý sharalary bastaldy. Oǵan sáıkes, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp, 200 AEK-ke (612 600 teńge) deıingi mólsherde aıyppul salý ne sol mólsherde túzeý jumystary nemese 200 saǵatqa deıingi merzimge qoǵamdyq jumystarǵa tartý ne 50 táýlikke deıingi merzimge qamaýǵa alý jazasy qarastyrylǵan.
