Qorqyttyń qaraǵaıdan qaıyryp, úıeńkiden úıirip alǵan qyl qobyzy – álemdegi eń kóne aspap. Búginde onyń tilin biletin ónerpazdar kóp emes. Sondaı-aq kópshilikke úıretý baǵyty da aqsap turǵany málim.
– Qobyzdyń úninde qazaqtyń muńy, qýanyshy men qaıǵysy jatyr. Mundaı saf ónerdi joǵaltyp almaý mańyzdy. Ony nasıhattaý aımaqtaǵy mádenıet, rýhanııattyń ordasy sanalatyn halyq shyǵarmashylyǵy ortalyǵy úshin mańyzdy mindet bolyp tabylady, – deıdi oblystyq «Shańyraq» halyq shyǵarmashylyǵy ortalyǵynyń basshysy Jarqynbek Amantaı.
Al «Shalqyma» úıirmesiniń jetekshisi Bóken Jigerdiń aıtýynsha, basymdyq qobyzǵa beriledi.
– Qazaqtyń dástúrli, halyq ánderin, kúıin úıretemiz. Bizdegi basty erekshelik, qatysýshylar tek dombyra ǵana emes, qobyzda oınaýdy da úırenedi. Úıirme jumysynda osy kóne aspabymyzǵa basymdyq berýdi josparlap otyrmyz. Ondaǵy maqsat – qyl qobyzdy dáripteý. Onymen qosa, qoǵam arasynda, ásirese jastar tarapynan qobyzǵa degen qyzyǵýshylyqtyń joǵary ekenin baıqadyq, – deıdi ol.
