Qoǵam • 28 Qańtar, 2022

Elimizde áleýmettik tólemderdiń kólemi artty

1604 ret kórsetildi

2022 jylǵy 1 qańtardan bastap memlekettik áleýmettik saqtandyrý qorynan tólenetin úsh áleýmettik tólemniń mólsheri ulǵaıdy. Bul 347,7 myń adamǵa paıdasyn tıgizdi, dep habarlaıdy Egemen.kz.

«Osylaısha, QR Úkimetiniń 2021 jylǵy 17 qarashadaǵy qaýlysyna sáıkes satyp alý qabiletin saqtaý maqsatynda 1 qańtardan bastap eńbek etý qabiletinen aıyrylǵan jaǵdaıda (75 130 alýshy) jáne asyraýshysynan aıyrylǵan jaǵdaıda (52 096 alýshy) MÁSQ-dan tólenetin aı saıynǵy áleýmettik tólemderdiń mólsheri 5%-ǵa artty», dep habarlady Eńbek jáne halyqty áleýmettik qorǵaý mınıstrligi.

Mınıstrlikte atap ótkendeı, bul tólemder uzaq merzimdi bolyp tabylady, óıtkeni olar birneshe jyl boıy tólenýi múmkin: eńbek etý qabiletinen aıyrylǵan jaǵdaıda – adam eńbekke qabilettiligin qalpyna keltirmeıinshe ne zeınetkerlik jasqa jetkenshe; asyraýshysynan aıyrylǵan jaǵdaıda – balalarǵa kámelettik jasqa tolǵanǵa deıin jáne kúndizgi oqý bóliminiń stýdentterine 23 jasqa deıin júzege asyrylady.

Budan basqa, alýshylar joǵaryda atalǵan tólemderdi bıýdjet qarajaty esebinen memlekettik áleýmettik járdemaqylardy da ala alady.

Sondaı-aq 1 qańtardan bastap AEK mólsheriniń ulǵaıýyna baılanysty bala bir jasqa tolǵanǵa deıin onyń kútimine baılanysty tabysynan aıyrylǵan jaǵdaıda MÁSQ-tan tólenetin aı saıynǵy áleýmettik tólem mólsheri arttyryldy. Bul 220 462 azamat úshin jaǵymdy jańalyq boldy. 

Eske sala ketsek, joǵaryda atalǵan áleýmettik tólemniń mólsheri balanyń týǵan kúnine deıingi sońǵy eki jyldaǵy ortasha tabystyń 40%-yn quraıdy. Bul rette bul áleýmettik tólemniń eń tómengi mólsheri ustalýǵa jatatyn mindetti zeınetaqy jarnalaryn qosymsha esepteı otyryp, «Balaly otbasylarǵa beriletin memlekettik járdemaqylar týraly» Zańǵa sáıkes týylǵan balanyń kezektiligine qaraı belgilengen aı saıynǵy memlekettik járdemaqy mólsherinen kem bolmaýǵa tıis.

Vedomstvoda habarlanǵandaı, joǵaryda atalǵan áleýmettik tólemderdiń mólsherin arttyrý MÁSQ aktıvteri esebinen júzege asyryldy. Osylaısha, áleýmettik qamsyzdandyrýdyń qosymsha nysanyn alýda jumys isteıtin halyqtyń múddeleri qorǵalmaqshy.

Sońǵy jańalyqtar

Uqsas jańalyqtar