Prezıdent • 28 Qańtar, 2022

Prezıdent Nur Otan partııasynyń kezekten tys HHI sezine qatysty

7575 ret kórsetildi

Qasym-Jomart Toqaev Nur Otan partııasynyń kezekten tys HHI sezine beınebaılanys rejıminde qatysty. Sondaı-aq jıynǵa Tuńǵysh Prezıdent – Elbasy, Prezıdent Ákimshiliginiń basshylyǵy, partııanyń Saıası keńesiniń músheleri qatysty. Otyrysty partııa Tóraǵasynyń birinshi orynbasary júrgizdi, dep jazady Egemen.kz Aqordaǵa silteme jasap.

Elbasy Nursultan Nazarbaevtyń sózinen jáne daýys berý rásiminen keıin Qazaqstan Prezıdenti Qasym-Jomart Toqaevty Nur Otan partııasynyń Tóraǵalyǵyna saılaý týraly Sezd qaýlysy qabyldandy. Sodan keıin Memleket basshysy jıynǵa qatysýshylar aldynda sóz sóıledi.

Qasym-Jomart Toqaev partııanyń jańa kóshbasshysy retinde sóılegen sózinde partııany basqarýǵa usynys jasaǵany jáne qoldaý kórsetkeni úshin rızashylyǵyn bilidirip, Nur Otan partııasyna tóraǵalyq etý asa jaýapty jumys ekenin atap ótti.

Prezıdent halqymyzdy dúrbeleńge salǵan qańtardyń basyndaǵy qaıǵyly oqıǵalar týraly aıta kele, lańkester men qylmyskerlerge toıtarys berip, memleketimizdiń tutastyǵyn saqtap qalǵanymyzdy málimdedi.   

«Quzyrly organdar kináli adamdardy anyqtap, jaýapqa tartý úshin tergeý júrgizýde. Bul jumys tek zań aıasynda júzege asyrylatynyna kúmán bolmaýǵa tıis. Bári Bas Prokýratýranyń jáne meniń jeke baqylaýymda bolady. Adam quqyǵyn mindetti túrde saqtaımyz. Budan bylaı mundaı qasiretke jol bermeımiz», dedi Prezıdent. 

Memleket basshysy qoǵamdyq qundylyqtar júıesine, saıası jáne áleýmettik-ekonomıkalyq salalarǵa túbegeıli ózgeris engizý qajet ekenine nazar aýdardy.

«Azamattyq qoǵam ınstıtýttaryna zor mindet júkteledi. Ásirese, saıası partııalar aıryqsha ról atqarýǵa tıis. Sonyń ishinde bizdiń partııamyzdyń alatyn orny erekshe. «Nur Otan» Qazaqstandy nyǵaıtýǵa baǵyttalǵan mańyzdy reformalardyń bastaýynda bolyp, túrli salada naqty jetistikke jetýimizge eleýli úlesin qosty», dedi Memleket basshysy. 

Qasym-Jomart Toqaev óz sózinde Elbasynyń jeke basyna qatysty el ishinde tarap jatqan túrli jaǵymsyz áńgimelerge túsindirme berdi. 

«Tuńǵysh Prezıdentimiz elimizdi irgesi berik memleketke aınaldyrý úshin zor eńbek sińirdi. Ol Otanymyzdyń jáne álem tarıhynda Táýelsiz Qazaqstannyń negizin qalaǵan tulǵa retinde qalatyny sózsiz. Elbasynyń 30 jylda el múddesi úshin atqarǵan jumysyn joqqa shyǵarýǵa bolmaıdy. Bul – tarıhqa qııanat jasaý degen sóz», dedi Memleket basshysy.

Qasym-Jomart Toqaevtyń pikirinshe, Qazaqstan halqy Nursultan Nazarbaevtyń tulǵasyna baǵa bergen kezde tarıhı derekterge shynaıy túrde súıenýi qajet.

«Nursultan Ábishuly Nazarbaev otandyq jáne álemdik jylnamada Qazaqstan Respýblıkasynyń negizin qalaýshy degen atpen qalady. 90-shy jyldardyń basynda Qazaqstannyń demografııalyq ereksheligine jáne shekarasynyń shegendelmeýine baılanysty belgili saıasatkerler men saıasattanýshylar elimizdi ydyrap ketedi dep boljam jasaǵan bolatyn. Osyndaı qıly zaman, tarıhı kezeńde Nursultan Ábishuly Nazarbaev memleket qurý jónindegi kúrdeli mıssııany óz moınyna aldy. Bul, shyn máninde, óte aýyr mindet edi», dedi Qazaqstan Prezıdenti.

Qasym-Jomart Toqaev Elbasynyń naryqtyq ekonomıkany qalyptastyrýǵa, jan-jaqty reformalardy júzege asyrýǵa, Táýelsizdiktiń eleń-alań kezinde áleýmettik-ekonomıkalyq sıpattaǵy kóptegen problemany sheshýge qosqan úlesin eske saldy. Sondaı-aq memlekettik shekarany rásimdeýge, qaýipsizdikti qamtamasyz etýge, elimizdiń geosaıası tuǵyryn nyǵaıtýǵa jáne astanany kóshirý isine sińirgen zor eńbegin atap ótti.

«Ol Amerıkanyń bes prezıdentimen, keńestik jáne reseılik bes basshymen, Qytaıdyń birqatar tóraǵalarymen jáne basqa da kóptegen memlekettiń basshylarymen, sondaı-aq BUU-nyń tórt bas hatshysymen jumys istedi. Álemdik qoǵamdastyqta ony jahandyq ıadrolyq qarýǵa qarsy qozǵalystyń kóshbasshysy dep ataıdy. Sonymen qatar Táýelsizdik jyldary Qazaqstannyń barlyq ekonomıkalyq kórsetkish boıynsha Ortalyq Azııa keńistiginde aldyńǵy orynǵa shyqqanyn umytpaýymyz kerek. Sondyqtan Tuńǵysh Prezıdenttiń tarıhı eńbegin umytpaıyq. Túptep kelgende, shynaıy ári ádil bolǵan jón. О́tkenin qaralaǵan halyqtyń bolashaǵy bulyńǵyr», dedi Qasym-Jomart Toqaev. 

Prezıdent el basqarý isinde jiberiletin kemshilikter týraly aıta kele, qatelikterge Amerıkanyń da, Qytaıdyń da basshylary, tipti Sıngapýrdyń alǵashqy Premer-Mınıstri  Lı Kýan Iý da boı aldyrdy degen pikir bildirdi.

«Biraq Sıngapýrdyń da, AQSh-tyń da, Qytaıdyń da halyqtary jáne basqarýshy toptary kúrishti kúrmekten ajyrata bilip, ózderiniń basshylaryn kemshilikterden joǵary qoıdy. Jumys istemeıtin adam ǵana qatelespeıdi degen sóz burynnan belgili. Sondyqtan Tuńǵysh Prezıdenttiń tıisti tarıhı eńbegine laıyqty baǵasyn bereıik. Al ketken qatelikter, elimizdiń keleshek basshylaryna sabaq bolsyn. Memleketimizdiń bolashaǵy turǵysynan alǵanda bunyń durys bolatynyna senimdimin», dedi Qasym-Jomart Toqaev.

Sonymen qatar, Memleket basshysy óz sózinde «qasiretti qańtar» oqıǵasynyń Táýelsizdik alǵan jyldardaǵy eń aýyr synaq bolǵanyn atap ótti. Prezıdent qoǵamnyń kemeldigi men memlekettiń kúsh-qýatyn synap kórýge arnalǵan emtıhandy sátti tapsyrǵanymyzdy aıtty. Osy rette Prezıdent bul oqıǵalardyń barlyq sebep-saldaryn tereń taldap, tıisti sabaq alý qajet dep sanaıdy.

«Elimiz damýdyń óte kúrdeli kezeńine aıaq basqanyn túsine otyryp, Nur Otan partııasyn basqarý usynysyn rızashylyqpen qabyldaımyn. Bul sheshim partııany transformasııalaý jáne búkil qoǵamdy uıystyrý jumystaryna kirisýge daıyndyqty bildiredi. Osy rette men Memleket basshysy retinde ashyq jáne ádil saıası básekelestik bolatynyna kepildik beremin. Meniń konstıtýsııalyq mindetim – barlyq bılik tarmaǵynyń kelisilgen is-áreketin jáne memlekettik organdardyń halyq aldyndaǵy jaýapkershiligin qamtamasyz etý. Árıne, bul jaǵdaılar Prezıdenttiń kez kelgen partııa men qozǵalystardyń qyzmetinen belgili bir dárejede alshaqtaýyn talap etedi. Sondyqtan biraz ýaqyttan keıin, bálkim osy jyldyń ishinde, Nur Otan partııasyna odan ári tóraǵalyq etýimniń oryndylyǵy týraly máselege qaıta oralamyz. Memleket basshysynyń teń qashyqtyqtaǵy mártebesi saıası reformalardyń aýqymdy toptamasynda birjola bekitilýi kerek», dedi Qasym-Jomart Toqaev.

Prezıdent elimizdi jan-jaqty jańǵyrtý úshin usynylǵan aýqymdy máseleni eske saldy. Onyń pikirinshe, Nur Otan reformalardy júzege asyrýǵa belsene atsalysýǵa, Qazaqstandy qarqyndy túrde qaıta qurýdyń jáne jańartýdyń negizgi qozǵaýshy kúshi retinde áreket etýge tıis.

Bul úshin Nur Otan ózin-ózi jańartýy kerek. Partııanyń búkil jumysyn sóz júzinde ǵana emes, túbegeıli qaıta qurý qajet, dedi Qasym-Jomart Toqaev.

Memleket basshysy partııa múshelerin tómendegi basymdyqtarǵa basa mán berýge shaqyrdy.

Prezıdent partııa ishindegi yntymaqty nyǵaıtýdy, qoǵamdaǵy barlyq konstrýktıvti kúshti biriktirýdi birinshi mindet retinde atady. Onyń aıtýynsha, Jańa Qazaqstandy qurý úshin aýyzbirshiliktiń, seriktestiktiń, nyq ustanym men bolashaqqa senimniń mańyzy zor.

Sonymen qatar Qasym-Jomart Toqaevtyń aıtýynsha, partııa memlekettik organdardyń jumysyn qaıtalamaýy kerek. Prezıdent Nur Otan partııasy negizinen ıdeologııalyq jáne kadrlyq jumystarmen aınalysyp, qajet jaǵdaıda memlekettik apparattyń jumysyna jol siltep otyrýy kerek ekenine nazar aýdardy.

«Partııanyń ómirsheńdigi saılaýaldy ýádelerdiń qanshalyqty oryndalatynyna baılanysty ekenin túsiný kerek. Meniń oıymsha, shyndyqqa janaspaıtyn jáne oryndalmaıtyn ýáde bermegen abzal. «Aryq aıtyp, semiz shyqqan» jón. Aqıqatqa týra qaraý qajet. Sondyqtan partııa Úkimetpen jáne ákimdiktermen birlese otyryp, saılaý aldyndaǵy ýádelerdiń oryndalýyn túbegeıli qadaǵalaýy kerek», dedi Memleket basshysy.

Budan bólek, Prezıdent partııanyń uıymdyq qurylymyn qaıta qaraýdy, atap aıtqanda, birinshi orynbasar laýazymyn atqarýshy hatshy qyzmetimen almastyrýdy, sondaı-aq tıisti baǵyttar boıynsha basqa da hatshylardyń laýazymdaryn qaıta qarastyrýdy tapsyrdy.

Qasym-Jomart Toqaev qoǵamdyq keńesterdiń qazirgi josparlaryn, olardyń jeke quramdaryn qosa alǵanda túbegeıli jańartýǵa, basqa partııalar men qoǵamdyq birlestiktermen aradaǵy yntymaqtastyqty jolǵa qoıýǵa shaqyrdy.

Prezıdent Májilistegi partııanyń fraksııasyn qaıta qaraý, partııa músheleriniń óńirlerdegi ózekti áleýmettik-ekonomıkalyq máselelerdi sheshýge atsalysýyn kúsheıtý, qoǵamdyq qabyldaýlar qyzmetin jandandyrý, partııanyń sybaılas jemqorlyqpen kúres jónindegi strategııasyn jańa mazmunda tolyqtyrý, partııa quramyndaǵy tolyp jatqan tııanaqsyz, tabansyz, mansapqumar tulǵalardy oryndarynan alý, sondaı-aq partııanyń Jas Otan jastar qanatynyń jumysyn sapaly túrde kúsheıtý qajet dep sanaıdy.

Qasym-Jomart Toqaev «Qazaqstan halqyna» qorynyń qyzmetine arnaıy toqtaldy. Qorǵa aqshalaı úles qosqan kásipkerlerge rızashylyǵyn bildirdi. Sonymen qatar olıgopolııanyń bir bóligi, tipti sonyń dál ózi bolyp tabylatyn bıznestegi keıbir belgili tulǵalardyń Prezıdent bastamashy bolǵan qaıyrymdylyq aksııasyna qatysýǵa asyqpaıtyndaryn atap ótti.

«Buny qalaı túsinýge bolady? Sarańdyq pa, nıgılızm be, salǵyrttyq pa álde mensinbeý me? Qalaı bolǵanda da, bul suraqtyń jaýabyn alýǵa memlekettiń quzyreti jetedi. Iri bıznes tarapynan jasalatyn qaıyrymdylyq úderisin retteıtin arnaýly Jarlyq shyǵarýdy josparlap otyrmyn», dedi Memleket basshysy.

Qasym-Jomart Toqaev sóziniń sońynda Prezıdent qyzmetinde bolsyn jáne partııa jumysynda bolsyn el múddesine berik bolý qaǵıdatyn ustanatynyn jetkizdi.

Nur Otan – elimizdiń negizgi saıası kúshi. Sondyqtan Qazaqstannyń bolashaǵy úshin, eń aldymen, bizdiń partııamyz jaýapty. Árqaısymyz osy jaýapkershilikti tereń sezinip, jumys isteýimiz qajet. Shyn máninde, Nur Otan memleketshilder partııasy bolýy kerek. Uıym músheleri memleket múddesin bárinen bıik qoıýǵa tıis, dedi partııa Tóraǵasy.

Sońǵy jańalyqtar

Dollar qymbattady

Qarjy • Búgin, 10:59

Elordada áýe shary qulady

Oqıǵa • Búgin, 10:37

Qarjy mınıstriniń orynbasary taǵaıyndaldy

Taǵaıyndaý • Búgin, 10:24

EQYU Bas hatshysy Qazaqstanǵa keledi

Parlament • Búgin, 09:31

Beısenbige arnalǵan aýa raıy boljamy

Aýa raıy • Búgin, 09:00

Uqsas jańalyqtar