Alash ardaqtysynyń 50 jyldyǵy aldymen 1922 jyly qyrkúıekte Tashkentte boldy, sol kezde merzimdi baspasózde S.Sádýaqasov, M.Áýezov, M.Dýlatov, E.Omarov sekildi zamandastary kórnekti tulǵanyń qazaq halqyna sińirgen eńbegin joǵary baǵalap, maqalalar jarııalady.
Al 1923 jyly 28 qańtarda Orynborda ótken ult qaıratkeriniń elý jyldyǵyna arnaǵan jıyndy Sáken Seıfýllınniń ózi basqaryp, sóz sóıledi. Daýylpaz aqynnyń ol sózi 1923 jyly 30 qańtar kúngi «Eńbekshi qazaq», (búgingi «Egemen Qazaqstan») gazetinde jarııalandy. Onda: «Ahmet Baıtursynuly – ultyn shyn súıetin shyn ultshyl! О́zge oqyǵan myrzalar shen izdep júrgende qazaqtyń ult namysyn jyrtyp, ulttyq aryn joqtaǵan patsha zamanynda jalǵyz-aq Ahmet edi. Ahmet qazaq ultyna janyn aıamaı qyzmet qyldy. Áýeli ol shkolda qazaq balalaryn oqytty. «Qazaq» gazetin shyǵardy. Qazaq mektepterine arnap «Oqý hám til quraldaryn» jazyp shyǵardy. Ahań – baıyn, kedeıin aıyrmaı, qazaqty ǵana súıetin adal júrek, taza ultshyl» dep jazǵan eken.
Jıynda qazaq halqynyń ánderin jınaqtaýshy, belgili kompozıtor Aleksandr Zataevıch Ahańnyń mýzykalyq shyǵarmalaryn oryndap, jıylǵan qaýymnyń kóńilin kóteripti. Osydan keıin Ahmet Baıtursynulynyń mereıtoıy kózi tirisinde ótken joq.
