Bul kezdesýge Mádenıet jáne sport vıse-mınıstri Nurǵısa Dáýeshov, KSRO halyq ártisi, kınostýdııanyń kórkemdik jetekshisi Asanáli Áshimov, sondaı-aq kınostýdııanyń ákimshilik-sharýashylyq isi jónindegi vıse-prezıdenti Aıdarhan Ádilbaev, óndiris jónindegi vıse-prezıdenti Aıdar Batalov, «Qazaqfılm» prezıdentiniń strategııalyq máseleleri boıynsha keńesshisi Álı Sháýkenov, t.b. kıno mamandary qatysty.
Kezdesý barysynda mınıstr kınostýdııadaǵy Qazaq kınosynyń mýzeıin aralap, eski kınokameralar, qoldanylǵan kostıýmder, Sháken Aımanovtyń jınaǵan kolleksııasy men ózi qoldanǵan jeke zattary saqtalǵan ulttyq kıno óneriniń tarıhynan syr shertetin jádigerlermen tanysty.
Sondaı-aq Dáýren Abaevqa 2021-2023 jyldarǵa josparlanǵan jańǵyrtý baǵdarlamasy sheńberinde satyp alynǵan zamanaýı túsirilim tehnıkasy – kameralar, jaryq quraldary jáne basqa da jabdyqtar kórsetildi. Odan bólek sońǵy eki jylda túsirilgen fılmder týraly jan-jaqty baıandalyp, elimizdiń basty kıno alańynyń búgingi tynys-tirshiligi men alǵa qoıǵan josparlary aıtyldy. Kınostýdııanyń vıse-prezıdenti Aıdarhan Ádilbaev «Qazaqfılmdi» jańǵyrtý boıynsha egjeı-tegjeıli baıandap, qosymsha qarjylandyrý múmkindigin qarastyrý týraly ótinishin bildirdi.
– «Qazaqfılm» – elimizdiń brendi. Kınostýdııa eldiń kóńilinen shyǵatyn súbeli týyndylardy túsirýi kerek jáne osy baǵytta jumys isteýimiz kerek, – dedi mınıstr.
Kınostýdııanyń kórkemdik jetekshisi Asanáli Áshimov Mádenıet jáne sport mınıstrine «Qazaqfılmge» kelip, ulttyq kıno óneriniń máselelerine kóńil bólgenine alǵysyn aıtty. Sondaı-aq qazaq kınosynyń abyzy quramyna Oljas Súleımenov, Dýlat Isabekov, Smaǵul Elýbaev syndy basqa da kórnekti qaıratkerler kiretin bedeldi kórkemdik keńes qurýdy usyndy.
Basqosýda «Uly dala tańy» tarıhı fılminiń jumys nusqasy tamashalandy. Aıta ketsek, fılmniń rejısseri Aqan Sataev oqshaýlaný rejiminde bolǵandyqtan, kezdesýge qatysa almady. Alaıda fılmniń kórsetilimine basty róldi somdaǵan akterler – Qazaqstannyń halyq ártisi Tuńǵyshbaı Jamanqulov, Qazaqstannyń eńbek sińirgen qaıratkeri Berik Aıtjanov, fılmniń keńesshisi tarıhshy, professor Bereket Káribaev, kınostýdııanyń Dırektorlar keńesiniń múshesi Armanjan Baıtasov jáne basqa da óner qaıratkerleri qatysty.
Tarıhı kınotýyndyny kórgen qonaqtar joǵary baǵa berip, fılmniń tartymdy jelisi men basty keıipkerlerdiń rólin somdaǵan akterlerdiń sheberligin atap ótti.
