47 múgedek bir kúnde jumys ornyn tapty

Bul jolǵy jumys jármeńkesi múmkin­digi shekteýli jandarǵa arnaldy. «Bazarǵa baryp baǵyńdy syna» degendeı, «Nur Otan» partııasynyń oblystyq fılıaly, Ulttyq kásipkerler palatasynyń óńirlik keńesi jáne oblystyq jumyspen qamtýdy úılestirý jáne áleýmettik baǵdarlamalar basqarmasy birlesip uıymdastyrǵan jármeńke týraly olarǵa aldyn ala habarlanyp, jumysqa turý múmkindigi usynyldy. Bul jumysqa jaramdy jetpisten asa ǵarip jandardyń kútpegen qýanyshy edi. Sharaǵa oblys óńirindegi memlekettik organdardyń barlyǵy derlik qatysty, onyń syrtynda jıyrmadan asa bıznes qurylymdary da keldi. Aýrýmen alysyp júrip, mamandyq alǵan jastardyń talabyn ár jumys berýshi baǵalaı bilse kerek. Ivan Pershınniń mamandyǵy programmıst. Jasynan kompıýterge yntyq bolǵan ol mektepti bitirgen soń, Qostanaı polıtehnıkalyq kolledjine túsip osy mamandyqty ıgerip aldy. Alaıda, jumysqa ornalasýdy oılaǵanda oıy on sanǵa ketetin. Aıaq-qoly balǵadaı jastar jumyssyz júrgende, ony kim ala qoısyn dep tartyna beretin. Jármeńkege kelgen Ivannyń joly boldy. Ol Qostanaı oblystyq jastar saıasaty máseleleri basqarmasyna aqparattyq tehnologııalar tehnıgi bolyp ornalasty. Ony osy ýaqytqa deıin tájirıbeń, eńbek ótiliń joq dep qaıtara beretin edi. Jigittiń qýanyshynda shek joq. Jármeńkede múmkindigi shekteýli jandarǵa shaǵyn jáne orta bıznes kásiporyndary basshylary kúzetshi, programmıst, aýdarmashy, is júrgizýshi sııaqty kóptegen jumystar usyndy. Bir kúnde 47 múgedek jumys berýshilermen kelisip, jumysqa turatyn bolyp, qýanyp qaıtty. Kópshiligi birden kelisimshartqa otyrdy. – Bir kúnde múmkindigi shekteýli 47 adamnyń jármeńkeden jumys tabýy buryn-sońdy bolǵan emes. Olardyń qýanyshyn kórseńiz. Múgedek jandarǵa ár esikti qaǵyp, jumys izdeýdiń qıyndyǵyn kim túsinedi? Al jármeńkede kásipkerler men basqarma basshylary olarmen kezdesip, bilimi, biliktiligi, áleýmettik jaǵdaılary týraly habardar boldy. Jumysqa alýǵa ýádesin berdi, endi olar eshqandaı kedergisiz jumysqa ornalasady, – deıdi Jumyspen qamtýdy úılestirý jáne áleýmettik baǵdarlamalar basqarmasy Ardagerler jáne múgedektermen jumys bóliminiń jetekshisi Nurzııa Ábisheva. Búginde oblys óńirinde I-II toptaǵy jumysqa jaramdy 17 myń múgedek jandar esepte turady. Onyń 4 myńynyń nápaqasyn taýyp otyrǵan jumys orny bar. Sońǵy aılarda ótkizilgen jármeńkeler arqasynda taǵy da eki júzden asa adam jumysqa ornalasty. Jármeńkemen qatar oblysta kedergisiz qoǵam ornatý jumystary júrgizilýde. Qalalar men aýdandarda, tipti aýyldarda bes myńnan asa kólik, áleýmettik kommýnaldyq qyzmet kórsetetin nysandar tirkeýge alynǵan. Olardyń barlyǵynda derlik múgedek jandardyń kedergisiz júrip-turýyna qajetti pandýstar, sanıtarlyq bólmeler jaraqtalynýda. Bir qoǵamda ómir súrip otyryp, ala-qulalyq bolmasa kerek-ti. Adamnyń adamnan aıyrmasy múmkindiginiń shekteýliliginde emes, mádenıetiniń deńgeıine baılanysty ajyratylmaq. Al múgedek jandardyń jaǵdaıyna qarap, olarǵa qamqor qolymen qatar jumys usyný da mádenıet deńgeıin bildirse kerek. Qaıyrymdylyq jan baılyǵynyń belgisi. Jármeńke osyny uǵyndyrǵandaı boldy. Názıra JÁRIMBETOVA, «Egemen Qazaqstan». QOSTANAI.