Dodaǵa túsip, jeńimpazdar qatarynan kóringen 150 oqytýshy jyldyń úzdikteri atandy. Saltanatty sharada Bilim jáne ǵylym mınıstri Ashat Aımaǵambetov quttyqtaý sóz sóılep, úzdik oqytýshylarǵa jumystary úshin alǵys bildirip, tabys tiledi.
«Osy mańyzdy baıqaýdyń jeńimpazyn jańa tabystarymen quttyqtaımyn! Bıyl kelip túsken jumystardyń sapasy áldeqaıda joǵary boldy ári ortasha kórsetkish 15-20 balǵa ósti. Bul oqytýshylar quramy men jalpy bilim berý sapasynyń ósip kele jatqanyn kórsetedi. Bilim berý baǵdarlamalaryn jańartý boıynsha da jaqsy dınamıka bar. Elimizde jaqsy sapa kórsetetin joǵary oqý oryndary kóp. Biz muny maqtan tutýymyz kerek. Búginde memleket bilim berý sapasyn arttyrý, ǵylymdy qoldaý boıynsha júıeli jumys júrgizýde», dedi mınıstr.
Osy baıqaýda Ál-Farabı atyndaǵy QazUÝ-nyń 25 oqytýshysy oqý ordasynyń bilim berý jáne ǵylymı baǵdarlamalary men jobalarynyń joǵary deńgeıin dáleldep, úzdikter qatarynan kórindi. Bilim ordasynyń Hımııa jáne hımııalyq tehnologııalar fakýltetiniń aǵa oqytýshysy Nasıba Baımatova qýanyshty sátpen bólise kelip, «Oqytýshy rólin taldaı kele, qoǵam aldynda jas urpaqty tárbıeleýdegi jaýapkershiliktiń joǵary ekenin uǵynasyń. Osy mamandyqty tańdaǵanda stýdentterdi oqytý ǵana emes, ózińdi damytý jáne jetildirý jumysy turǵanyn naqty túsindim. «JOO úzdik oqytýshysy» syılyǵy bizdiń mamandyǵymyzdyń mańyzyn kórsetedi jáne ǵylymı-pedagogıkalyq qyzmetti jan-jaqty damytýǵa múmkindik beredi», dep atap ótti.
Marapattaý barysynda júldegerlerge arnaıy tósbelgi tapsyrylyp, árqaısysyna 6 mln teńgeden syıaqy berildi.
ALMATY
