О́tken ǵasyrdyń toqsanynshy jyldary kezinde ult ustazynyń kózin kórgen, sol úshin jazyqsyz qýdalanǵan kisilerdiń áńgimesin tyńdaǵan kónekóz qarııalardyń aıtýymen Ahańnyń týǵan úıiniń orny anyqtalyp, irgetasy qalpyna keltirilgen.
Jergilikti turǵyndardyń sózinshe, Sartúbekte 1960 jyldarǵa deıin sıyr fermasy bolǵan. Ferma qorasynyń, bazdardyń orny áli kúnge deıin bar. Toqsanynshy jyldary Ahań aqtalyp, alǵash ekspedısııa kele bastaǵanda sol kezde aýyl basqarǵan Raqymjan esimdi aqsaqal Baıtursyn úıiniń ornyna eki qatar saman kirpish qalatqan. 2007 jyly sol mańaıdaǵy eki aýyldyń turǵyndary birigip, eki qatar samannyń ústine qazirgi úıdi kóteredi. Sondyqtan bul – sol jerdegi halyqtyń asarlap júrip qoldan kirpish quıyp, sol kezdegi bar múmkindikti paıdalanyp joqtan bar jasap turǵyzǵan úı. Áý basta syrtqy qorshaýy da bolmapty, keıinirek Arqalyq qalasynda turatyn Abyl Erdenov degen azamat kelip, qorshap ketedi.
Keıin el ishinde «Ahańnyń úıi osy» dep aıtyla bastaǵanda, buǵan aýdan ákimdigi de nazar aýdaryp, aınalasyn abattandyryp, kommýnaldyq menshikke alady. Búginde jergilikti mańyzǵa ıe kıeli nysandar sanatyna engen Ahańnyń úıi aýyl ákimdigine qaraıdy. Úıge elektr symy tartylǵan. Biraq ishinde jalǵyz synyq parta men sýyq pesh jáne tórgi bólmege ilingen «Rýhanı jańǵyrý» dep jazylǵan Alash kósemderine arnalǵan bılbordtan basqa túk joq. Jádigersiz mýzeı sekildi qańyrap bos tur.
Bıyl IýNESKO kóleminde atap ótiletin mereıtoı barysynda Ahańnyń bul úıi de jóndelip, bútindeletin bolypty. Muny Jangeldın aýdanynyń ákimi Shota Ospanovtan estidik.
– Sol jerdegi eki aýyldyń turǵyndary jylda aqtap, syrlap, mańaıynyń tazalyǵyn saqtap keldi. Aldaǵy ýaqytta Ahmet Baıtursynulynyń 150 jyldyq mereıtoıynyń aıasynda osy úıdi jańartý máselesin qolǵa alaıyn dep otyrmyz. Jospar boıynsha Ahań úıiniń qazaqy kelbeti saqtalady. Bizdiń jasap qoıǵan jobamyzben oblys ákimi tanysyp, buǵan taǵy da ózimiz alyp-qosatyn bolamyz dedi. О́ıtkeni bizdiń jobamyz shamaly qazirgi úlgige jaqyndap ketipti. Sondyqtan bul jobamen tıisti mamandar taǵy aınalysady. Oǵan 22 mln teńge bólindi. Endi memlekettik satyp alý ótkizip, merdigerdi anyqtaý jumysy qaldy. Basty maqsat – úıdiń ishine kirgende sol zamannyń rýhy sezilip turýǵa tıis. Qazirgideı tóbesi alasa bolmaıdy. Ahańnyń atalary da, ákesi de dáýletti adamdar bolǵan. Sondyqtan bul úıdi de sol kezdegi aýqatty adamdardyń turmysyna laıyqtap jabdyqtaımyz, – dedi ákim.
Qostanaı oblysy
