Kezdesý barysynda eki eldiń kóshbasshylary Qazaqstan men Qytaı arasyndaǵy jan-jaqty strategııalyq seriktestiktiń, sonyń ishinde saıası, saýda-ekonomıkalyq, kólik-tranzıttik jáne mádenı-gýmanıtarlyq salalardyń aýqymdy máselelerin talqyǵa saldy.
Qasym-Jomart Toqaev Qytaı Tóraǵasyna iltıpat bildirip, qysqy Olımpıada oıyndarynyń saltanatty ashylý rásimi joǵary deńgeıde uıymdastyrylǵanyn atap ótti.
«Beıjińdegi Olımpıada oıyndary búkil adamzat úshin jaýapty sátte ótip jatyr. Bul sport saıystary jańarýǵa úndep, pandemııanyń syn-qaterlerin eńserýge úles qosady. Sondyqtan Sizdiń shaqyrýyńyzdy zor qýanyshpen qabyl aldym», dedi Memleket basshysy.
Prezıdent Jańa Qazaqstan qurý jolynda qajetti kómek kórsetýge nıet bildirgen Qytaı Tóraǵasyna rızashylyǵyn bildirdi.
Oǵan qosa, Qasym-Jomart Toqaev Sı Szınpınniń tıimdi basshylyǵymen qol jetkizgen Qytaı ekonomıkasynyń damý jetistikterine joǵary baǵa berdi.
Prezıdent dıplomatııalyq qatynastar ornaǵan 30 jyl ishindegi qazaq-qytaı qatynastarynyń damýy týraly sóz qozǵap, qos eldiń barlyq saladaǵy strategııalyq seriktestiktiń berik irgetasyn qalaǵanyna nazar aýdardy.
Qasym-Jomart Toqaev qazaq-qytaı dostyǵyn nyǵaıtý maqsatynda tyǵyz yntymaqtastyqqa ázir ekenin atap ótip, Sı Szınpındi qyrkúıek aıynda Qazaqstanǵa memlekettik saparmen kelýge shaqyrdy.
Kelissóz barysynda saýda-ekonomıkalyq baılanystardy arttyrýdaǵy birlesken is-qımylǵa erekshe nazar aýdaryldy. Prezıdent pandemııaǵa qaramastan, ekijaqty taýar aınalymy 2021 jyldyń qorytyndysy boıynsha 15,2 paıyzǵa ósip, 18,2 mıllıard dollarǵa jetkenin aıtty. Qytaı men Ortalyq Azııanyń bes eli arasyndaǵy jalpy saýdanyń jartysy Qazaqstanǵa tıesili.
Sonymen qatar, Qasym-Jomart Toqaev «Bir beldeý - bir jol» bastamasyn odan ári iske asyrý jónindegi basym mindetti atady. Memleket basshysy elimizdiń sıfrlyq tehnologııalar men kólik jáne logıstıka salalaryndaǵy yntymaqtastyqty nyǵaıtýǵa múddeli ekenin jetkizdi.
Kelissóz barysynda týrızm jáne mádenı-gýmanıtarlyq baılanystar salasyndaǵy yntymaqtastyqty damytýdyń perspektıvasy, sondaı-aq Qazaqstanda qytaı mádenı ortalyǵyn ashý máselesi talqylandy.
QHR Tóraǵasy «birtutas Qytaı» qaǵıdatyna qoldaý kórsetken Qasym-Jomart Toqaevqa alǵys aıtyp, strategııalyq yntymaqtastyqty odan ári jan-jaqty damytýǵa daıyn ekenine senim bildirdi.
Sı Szınpın Qazaqstan men QHR arasyndaǵy baılanystardyń aldaǵy 30 jyldaǵy altyn dáýirine osy kezdesý jol ashatynyn atap ótti.
QHR Tóraǵasy «Bir beldeý - bir jol» bastamasy júzege asyrylyp jatqan 9 jyl ishindegi oń yntymaqtastyqty atap ótti. Sondaı-aq Sı Szınpın aýyl sharýashylyǵy, jasyl energetıka, jasandy ıntellekt, qarjy jáne elektrondy saýda salalaryndaǵy ózara yqpaldastyqtyń keleshegine de erekshe nazar aýdardy.
Qytaı basshysy Sı Szınpın Qasym-Jomart Toqaevtyń parasatty ári kóregen basshylyǵymen Qazaqstannyń qýatty ári órkendegen memleketke aınalatynyna senim bildirdi.
Kezdesý sońynda Sı Szınpın Qasym-Jomart Toqaevtyń Qazaqstanǵa shaqyrýyn qabyl alyp, aldaǵy kúzde elimizge memlekettik saparmen kelý jónindegi josparymen bólisti.
