Kúni keshe ǵana Birikken Arab Ámirlikteriniń (BAÁ) Fýdjeıro qalasynda taekvondodan Fujairah Open týrnıri aıaqtaldy. Reıtıngtik týrnırde jerlesterimiz biraz oljaǵa keneldi. Ásirese biz 54 kılo salmaqtaǵy Saıat Tórequldyń teńdessiz ónerine tamsandyq. Qarsy kelgenderdiń barlyǵyn qoǵadaı japyrǵan qandasymyz bas júldeni qanjyǵasyna baılady. Jeńis tuǵyrynyń eń bıik satysyna kóterilýge Dúısenbek Áziret, Nurlan Myrzabaev jáne Nargıza Qoıshybektiń de tamasha múmkindikteri boldy. Sheshýshi synǵa deıin alqynbaı jetken qazaq sportshylary sońǵy tusta utylyp, kúmis medaldy qanaǵat tutty. Al Smaıyl Dúısebaı men Nurbek Jamshaev qola júldeni enshiledi. Osylaısha, 1 altyn, 3 kúmis, 2 qolany oljalaǵan Qazaqstan quramasy BAÁ-degi týrnırde úzdik komandalardyń qatarynan kórindi.
Fransııanyń Salon-de-Provans qalasynda marafonshylardyń saıysy óz máresine jetti. 10 shaqyrymdyq qashyqtyqta Janna Mamajanova shashasyna shań juqtyrmaı, máre syzyǵyn birinshi bolyp qıyp ótti. Onyń kórsetkishi – 33 mınýt 56 sekýnd. Bul – qazaq qyzynyń bıylǵy maýsymdaǵy ekinshi bas júldesi. Qańtar aıynyń sońynda Janna atalǵan memlekettiń Le Lıýk qalasynda ótken shaǵyn marafonda da aldyna jan salmaı, altynnan alqa taqqan bolatyn.
Bul kúnderi Ýkraınanyń astanasy – Kıevte semserlesýden Álem kýbogynyń kezeńdik saıysy ótip jatyr. Atalǵan jarysta qazaqstandyq Sofııa Nıkolaıchýk qola medaldy moınyna ildi. Jerlesimiz tek Reseıdiń qos ókili – Iаna Bekmýrzova men Anastasııa Nazarovdan ǵana qalyp qoıdy.
