Shvesııa úkimeti barlyq shekteýdi alyp tastaıtynyn jarııalady jáne eldiń densaýlyq saqtaý júıesine qysym joǵary bolǵanyna qaramastan, COVID-19 synamasynyń kópshiligin toqtatty.
«Bul pandemııany biletindikten, aıaqtaldy dep aıtar edim. Ol aıaqtalǵan joq, biraq bolyp jatqan shuǵyl ózgerister men shekteýler turǵysynan qarasaq, aıaqtaldy», dedi densaýlyq saqtaý mınıstri Lena Hallengren.
Mınıstrdiń aıtýynsha, COVID-19 budan bylaı qoǵam úshin qaýipti aýrý bolyp sanalmaıdy. Shvesııa úkimeti bul sheshimdi vaksınanyń joǵary deńgeıimen jáne aýyr haldegi adamdardy aýrýhanaǵa jatqyzý deńgeıi tómendeýine baılanysty túsindirdi.
Kelesi aptadan bastap barlar men meıramhanalardyń keshki saǵat 11-den keıin ashyq bolýyna ruqsat etiledi, qonaqtar sany shektelmeıdi. Sondaı-aq, jabyq mekemelerge barýǵa, vaksınalardy paıdalanýǵa shekteýler alyp tastaldy.
Ýmeo ýnıversıtetiniń vırýsologııa professory Fredrık Elg COVID-19 boıynsha barlyq shekteýdi alyp tastaýǵa qarsy boldy. Ol shved aýrýhanalary áli de aýyrtpalyqty sezinetinin aıtty. COVID-ke shaldyqqan 2 200-ge jýyq adam stasıonarlyq emdeýdi qajet etedi, bul 2021 jyldyń kóktemindegi úshinshi tolqynmen birdeı.
«Sál shydamdy bolýymyz kerek, kem degende taǵy eki apta kútýimiz kerek. Testileýdi jalǵastyrýǵa qarajatymyz jetedi. Bul aýrý áli kúnge deıin qoǵamǵa úlken qıyndyq týdyryp otyr», dedi ol.
Alaıda Shvesııanyń Densaýlyq saqtaý agenttigi testileý túsken paıdaǵa qaraǵanda tym qymbat ekenin aıtty. Shvesııa jyldyń alǵashqy bes aptasynda testileýge 55 mıllıon shved kronasyn (55 mıllıon dollar) jáne pandemııa bastalǵaly beri shamamen 24 mıllıard kron jumsaǵan.
1 kún buryn Shvesııada 114 adam qaıtys boldy. Barlyǵy 16 182 adam COVID-19-dan qaıtys boldy. Jan basyna shaqqandaǵy ólim sany Skandınavııaǵa qaraǵanda edáýir joǵary, biraq kóptegen Eýropa elderine qaraǵanda tómen.
