Qasym-Jomart Toqaevtyń Tatarstan jerindegi sapary Nıjnekamsk qalasynda jalǵasty. Memleket basshysy Tatarstan Respýblıkasynyń Prezıdenti Rýstam Mınnıhanovpen birge Nıjnekamsk qalasyndaǵy «TANEKO» munaı óńdeý jáne munaı-hımııa zaýyttarynyń keshenine bardy. «Tatneft» kompanııasynyń negizgi munaı óńdeý aktıvi sanalatyn bul keshen – Reseıde Keńes Odaǵy ydyraǵannan keıin jańadan salynǵan alǵashqy óndiris orny.
.JPG)
Qazaqstan Prezıdentine zaýyttaǵy óndiris jumystarynyń barysy tanystyrylyp, keshenniń ónimderi týraly málimet berildi.
Kásiporyn 2005-2010 jyldary salyndy. Bul alyp keshende jumys istep turǵan qural-jabdyqtyń 80 paıyzy Reseıde shyǵarylǵan. Memleket ekonomıkasyna tyń serpin bergen joba qurylys ındýstrııasynyń, jobalaý ǵylymynyń, mashına jasaýdyń, ınjınırıngtiń damýyna jol ashyp, ekonomıkanyń aralas salalaryndaǵy jumyspen qamtý máselesine oń septigin tıgizgen.
Keshende 30 túrli ónim shyǵaratyn 28 óndiristik qondyrǵy jumys isteıdi. Sonyń ishinde «Evro-6» standartyna sáıkes keletin AI-92, AI-95, AI-100 avtomobıl benzıni men dızel otyny, avıasııalyq kerosın, keme otyny, bazalyq maılar jáne jaǵarmaı materıaldary bar.
Kompanııa basshylary Prezıdentke Qazaqstandaǵy Saran qalasyndaǵy salynyp jatqan shına zaýyty men Atyraýda qolǵa alynatyn kaýchýk óndirisi boıynsha jobalar týraly málimet berdi.
Qasym-Jomart Toqaev Eýrazııalyq ekonomıkalyq odaq aıasynda Qazaqstan men Reseı kompanııalary arasyndaǵy seriktestikti odan ári nyǵaıtýdyń mańyzdy ekenin, atalǵan kásiporyndardyń elimizdegi birlesken jobalaryna qoldaý kórsetiletinin aıtty.
Memleket basshysy «Tatneft» kompanııasynda tájirıbe jınap júrgen qazaqstandyq jastarmen kezdesip, elge bilikti maman bolyp oralýlaryna tilektestik bildirdi.
Sonymen qatar jýyrda «Tatneft» kompanııasy men Semeıdegi Geologııalyq barlaý kolledji arasynda yntymaqtastyq týraly kelisimge qol qoıyldy. Bıyldan bastap qazaqstandyq kolledj stýdentteri atalǵan iri kásiporynda óndiristi tájirıbeden ótedi.
