Abzalǵa qarǵa adym jer jetpedi!

Olımpııa oıyndarynyń bas­talǵanyna 10 táýlik ótse de, Qazaqstan qurama komandasynyń qorjyny áli bos. Sol sebepti jankúıerler ár básekeni taǵatsyzdana kútip, kún saıyn jarysqa shyǵatyn jer­lesterimizdiń jolyna úlken úmit­pen qaraýda. Bul joly biz short-trek sheberlerine erekshe úmitpen qaradyq. Álem kýbogynyń kezeńdik saıystarynda tabysty óner kór­setken sportshylarymyz tórt jyl­dyqtyń basty dodasynda bir jarq etip kórinse dep armandadyq. Shırek fınalǵa joldama alǵan úsh jigitimizdiń ekeýi jartylaı fınalǵa ótti. Olar – Denıs Nıkısha men Abzal Ájiǵalıev. Ádil Ǵalıahmetov besinshi orynda qalyp qoıyp, jarys­ty aıaqtady. Dál osy 500 metrlik mejede Phenchhan Olımpıadasynyń jeńimpazy, álemniń eki dúrkin chempıony jáne bes dúrkin júldegeri, Eýropa birinshiliginde 13 márte (3 altyn+8 kúmis+2 qola) jeńis tuǵyryna kóterilgen Majarstannyń áıgili sportshysy Shaolın Shandor Lıý de súrindi.

Jartylaı fınalda Abzal óz tobynda ekinshi oryndy ıelenip, fınalǵa shyqsa, Denıs tórtinshi orynda qalyp qoıdy. V tobynda óner kórsetken Nıkısha qorytyndy esepte segizinshi satyǵa taban tiredi. Al qandasymyz jeńis tuǵyryna synyq-súıem ǵana jetpeı, tórtinshi orynǵa turaqtady. Sheshýshi tusta Ájiǵalıevke sál ǵana sáttilik jetis­pedi. Onyń ústine, Petro Sıgel dál Abzaldyń aldyna kelip jyǵyldy. Italııalyq sportshyny aınalyp ót­ken qazaqtyń óreni sol sátte asa qun­dy sekýndtaryn joǵaltty. Áıt­pe­gende, Ájiǵalıevtiń jeńis tuǵy­ryna kóterilýi bek múmkin edi. Bir­aq Abzalǵa Beıjińde ondaı baq buıyr­mady.

Desek te, bul joly qazaqstandyq short-trekshiler Olımpııa oıyn­daryndaǵy ózderiniń eń iri tabysyna qol jetkizgenin aıta ketýge tıispiz. Buǵan deıin osy sport túrin serik etken otandastarymyzdyń eshbiri atalǵan dodada úzdik tórt­tikke engen emes. Sondyqtan da jeńiske jetý úshin janyn salyp aıqasqan Abzal Ájiǵalıevke jáne az ǵana ýaqyt aralyǵynda óte myq­ty komanda jasaqtaı bilgen Mádi­ǵalı Qarsybekovke myń da bir alǵys aıtqymyz keledi. Al bul jarys­ta bas júldeni Phenchhan Olım­pıadasynyń jeńimpazy, ma­jar­standyq Lıý Shandor oljalady. Reseılik Konstantın Ivlıev kúmis jáne kanadalyq Stıven Dıýbýa qola medaldy ıelendi.

Básekeler aıaqtalǵan bette BAQ ókilderine bergen suhbatynda A. Ájiǵalıev: «Olımpıadanyń irikteý synynan súrinbeı ótýdiń ózi óte qıyn boldy. Sebebi onyń aldyndaǵy maýsymda densaýlyǵym syr bergen edi. Sonyń saldarynan biraz ýaqyt babyma kele almadym. Meniń kópten bergi armanym – elimizde short-trekti damytýǵa súbeli úles qosý. Qazaq balalary qysqy sport túrlerine beıim emes degen taptaý­ryndy buzǵym keldi. Bizdiń de konkı teýip, syrǵanaı alatynymyzdy kórsetýge tyrystym. Jalpy, jankúıerler jazǵy sport túrlerinde óner kórsetip júrgen atletterdi birden tanıdy. Al qysqy sportta qansha júlde alsaq ta, tasada qalyp qoıyp júrmiz. Short-trek elimizdegi eń jas sport túrleriniń biri ekenine qaramastan, jerlesterimiz Álem kýbogy kezeńderinde únemi júlde alyp júr. Osy jeńisti dástúrdiń aldaǵy ýaqytta da jalǵasatynyna senimdimin. Al búgin qazaq halqyn qýantý úshin barymdy saldym. Fınalǵa deıin eki birdeı Olım­pıada chempıonynyń jarys jolynan shyǵyp qalýynyń ózi kóp nárseni ańǵartsa kerek. Osyndaı básekelestik beleń alyp turǵan sa­ıys­tyń sheshýshi synyna deıin alqynbaı jetkenime qýanyshtymyn. Biraq maǵan Olımpıada medali bu­ıyr­mady. Árıne, bul ókinishti», dep aǵynan jaryldy.

Taý shańǵysynan ótken slalom saıysynda Zahar Kýchınniń jigersizdigine kúıindik. Birinshi múmkindiginde óreskel qatelikke boı aldyrǵan ol jarys jolynan shyǵyp qaldy. Bul tartysta jastar arasyndaǵy álemniń alty dúrkin chempıony, Álem kýbogy kezeńdik básekeleriniń 10 dúrkin jeńimpazy 24 jastaǵy shveısarııalyq Marko Odermatt teńdessiz dep tanyldy. «Er kezegi úshke deıin» demekshi, osyǵan deıin eki birdeı Olımpıadadan oljasyz oralǵan slovenııalyq Jan Kranestiń Beıjińde baǵy janyp, kúmis medaldy keýdesinde jarqyratty. Álem chempıonatynda úsh ret top jarǵan fransııalyq Mate Fevrge qola medal buıyrdy.

Frıstaıl-akrobatıkadan ótetin jarysta qazaqtyń qos sulýy – Jan­bota Aldabergenova men Aq­mar­jan Qalmurzaeva óz ónerlerin ortaǵa salýǵa tıis edi. Biraq aýa raıynyń qolaısyzdyǵyna baılanysty bul básekeler keıinge shegerildi. Kelesi kúngi básekede eki sport­shymyz irikteý jarys­ta­ryna qatysyp, fınalǵa shyǵý úshin bar ónerlerin ortaǵa saldy. Aq­marjan Qalmurzaeva ekinshi irik­teýde 98.68 upaı jınap, birinshi orynmen jarystyń birinshi fınalyna joldama aldy. Birinshi irikteýde ol nebári 70.86 upaı toptaǵan edi.

О́kinishke qaraı, Janbota Alda­bergenova fınalǵa joldama ala almady. 80.56 upaıǵa ıe bolǵan ol jetinshi orynǵa taban tirep, fınalǵa joldama beretin úzdik altylyqtyń qatarynan tys qaldy.

Bıatlonshylardyń básekesinde Galına Vıshnevskaıa-Sheporenko men Aleksandr Mýhınge jankúıer boldyq. Áý basta jastar býyny ara­syndaǵy jarystarda jasyn­daı jarqyldaǵan 28 jastaǵy Vısh­nevskaıa-Sheporenko ýaqyt oza Azııa oıyndarynyń tórt dúrkin chempıo­ny atanyp, Azııa birinshiligi men Dúnıejúzilik Ýnıversıadany eki retten utty. Biraq tórtkúl dúnıeniń dúldúlderi jınalǵan jarysqa ol daıarlyqsyz kelgen eken. Báseke barysynda nysanany tórt márte dál kózdeı almaı, jeńimpazdan jeti mınýt­tan asa ýaqyt qalyp qoı­­ǵan Galına 52-oryndy qanaǵat tut­ty. Altyn alqany moınyna ilgen nor­vegııalyq Marta Olsbıý-Reıseland 10 shaqyrymdy 33 mınýt 18 sekýndta júrip ótti. Nysana kóz­deýde bir ret qana múlt ketti. Osy­­laısha, ol Beıjińde dara talantymen úshinshi márte oqshaýlandy. Odan bólek Olsbıý-Reıselandtyń 11 dúrkin álem chempıony degen dardaı ataǵy taǵy bar. Martanyń otandasy Tırıl Ekhoff qolaǵa qol sozsa, shvesııalyq Elvıra Eberg kúmispen kúpteldi.

Osy qashyqtyqtaǵy basty fa­vorıtterdiń biri Ingrıd Tandrevold edi. 25 jastaǵy norvegııalyq bıatlon­shy álem chempıonatynda 3 altyn, 2 kúmis jáne 1 qolany oljalaǵan. Olımpıadaǵa da jaqsy daıarlyqpen keldi. Biraq dál jarys kezinde Ingrıdtiń densaýlyǵy syr berip, ol óz deńgeıinde óner kórsete almady. Máre syzyǵyn qıyp ótken bette Tandrevold esinen tanyp qulady. Dárigerler ony zembilge salyp áketip, aýrýhanada qajetti em-dom jasady. «Aq halattylardyń» aıtýynsha, Ingrıdtiń densaýlyǵy birte-birte durystalyp keledi.

Bıatlonnan erler básekesinde baq synaǵan Mýhınniń óneri tipten súreńsiz boldy. 12,5 shaqyrymdyq qashyqtyqta júgirgen ol 58 sport­shynyń tek bireýinen ǵana ozyp, 57-orynǵa turaqtady. Bul jarysta Kenın Fııon-Maıe jeńimpaz atansa, odan keıingi oryndardy nor­vegııalyq Tareı Bıo men reseılik Edýard Latypov ıemdendi.

Konkıshiler saıysynda Ekate­rına Aıdova kúsh synasty. Bul onyń tórtinshi Olımpıadasy edi. Vankýver, Sochı jáne Phenchhannan otandasymyz quralaqan oraldy. Osy Olımpııa oıyndarynyń ashylý saltanatynda Qazaqstannyń týyn ustap shyqqan 30 jastaǵy sportshymyz Beıjińde jeńis tuǵyryna kóteriletin shyǵar dep úmittendik. Biraq ol úmit aqtalmady. Aıdova 20-oryndy ıelendi. Bul tartysta amerıkalyq Erın Djonsonnyń aldyna eshkim túse almady. Kúmis jáne qola medaldardy japo­nııa­lyq Mıho Takagı men Angelına Golıkova ózara bólisti.

Shańǵyshylardyń 4h10 shaqy­rymydyq estafetasynda quramynda Alekseı Chervotkın, Aleksandr Bolshýnov, Denıs Spısov jáne Sergeı Ýstıýgov bar Reseı quramasy sha­shasyna shań juqtyrmady. Je­ńim­paz komandanyń kórsetkishi – 1 saǵat 54 mınýt 50,7 sekýnd. Ekin­shi oryndy norvegııalyqtar en­shiledi. Skandınavııalyqtar bas­ty qarsylastarynan 1.07,2 sekýnd qalyp qoıdy. Úshinshi satyǵa Fran­sııanyń ókilderi jaıǵasty.

Jalpykomandalyq esepte Norvegııa quramasy basty qarsy­lasy – Germanııadan ozyp, jeke-dara kósh bastady. Olardyń qorjynynda 21 (9+5+7) júlde bar. Nemister (8+5+1) – ekinshi oryn­da. Úshinshi satyǵa AQSh-tyń (6+5+1) sportshylary jaıǵasty. Sondaı-aq Nıderland (6+4+2), Shvesııa (5+3+3), Aýstrııa (4+6+4), Reseı (4+5+8), Qytaı (4+3+2), Shveısarııa (3+0+5) jáne Italııa (2+6+2) quramalary úzdik ondyqtyń qatarynda.