2021 jylǵy tórtinshi toqsannyń qorytyndysy boıynsha eń tómengi eseppen memlekettik medısınalyq uıymdarda 228 mamannyń jetispeýshiligi baıqaldy. Olar – jalpy, dárigerlik praktıka, eresekter men balalar anestezıology, reanımatolog, terapevt, akýsher, eresekter men balalar gınekology, pedıatr, onkolog, otorınolarıngolog, oftalmolog, psıhıatr, neonatolog, rentgenolog, tomograf, ÝZI dárigeri jáne basqalar.
О́ńir basshylyǵy osy olqylyqtyń ornyn toltyrý úshin, sondaı-aq oblystyń áleýetin kóterý, kadr tapshylyǵyn azaıtý maqsatynda Aqtaý qalasynan M.Ospanov atyndaǵy Batys Qazaqstan medısına ýnıversıtetiniń Aqtaý qalasyndaǵy fılıalyn ashýǵa qol jetkizdi.
– Qazaqstan Respýblıkasynyń Prezıdenti Qasym-Jomart Toqaevtyń 2020 jylǵy 1 qyrkúıektegi Qazaqstan halqyna Joldaýynyń negizgi baǵyttarynyń biri – densaýlyq saqtaý júıesin damytý, atap aıtqanda, sapaly jáne qoljetimdi medısınalyq kómek berý. Osy maqsatta M.Ospanov atyndaǵy Batys Qazaqstan memlekettik medısına ýnıversıtetiniń fılıaly Mańǵystaý óńirinde ashylǵaly otyr. Bul aımaqta dárigerler daıarlap shyǵaratyn úlken bilim shańyraǵy bolmaq. Elimizdiń medısına ýnıversıtetterinde bakalavr, ınternatýra, rezıdentýra jáne magıstratýrada oqyp jatqan stýdentter endi Mańǵystaýda bilim alýyna múmkindik týyp otyr. Osyǵan oraı oblys ákimdigi tarapynan qosymsha granttar bólinip, stýdentter bilim alýda. M.Ospanov atyndaǵy Batys Qazaqstan memlekettik medısına ýnıversıteti fılıalynyń ashylýy rezıdentterge oqý men tájirıbeni qatar ushtastyrýǵa mol múmkindik beredi. Atalǵan bilim shańyraǵy antyna adal dárigerler daıarlap shyǵaratyn úlken bilim ordasy bolatynyna senemiz, – dedi fılıaldyń ashylý saltanatynda oblys ákiminiń orynbasary G.Qalmuratova.
Respýblıkalyq kórsetkishpen salystyrsaq, oblysta dárigerlik kadrlarmen qamtamasyz etý 10 myń turǵynǵa shaqqanda 17,1%-dy quraıdy. Búginde jergilikti bıýdjet esebinen elimizdiń medısınalyq joǵary oqý ornynda ınternatýra men rezıdentýrada 82 stýdent bilim alýda. 2018 jyly 11 rezıdent, 2019 jyly 39 rezıdent, 5 ıntern, 2020 jyly 9 rezıdent, 4 ıntern, 2021 jyly 11 rezıdent, 3 ıntern tegin oqýǵa túsken. Sondaı-aq 2023-2025 jyly jergilikti bıýdjet esebinen rezıdentýra mamandaryn daıarlaý úshin 2023 jyly 36 grant, 2024 jyly 50 grant, 2025 jyly 72 grant bóliný josparlanyp otyr.
M.Ospanov atyndaǵy medısınalyq ýnıversıtette bilim alǵan túlekter óńirdiń medısına salasynda az emes. Mysaly, Mańǵystaý oblystyq aýrýhanasynda 11 rezıdent, oblystyq balalar aýrýhanasynda 1 rezıdent, Munaıly ortalyq aýdandyq aýrýhanasynda 1 rezıdent, Aqtaý qalalyq №2 emhanasynda 20 ıntern, 60 dáriger, Jańaózen qalalyq №2 emhanasynda 12 ıntern, 19 dáriger, Senim medısınalyq emhanasynda 30 dáriger, Jańaózen qalalyq kópbeıindi aýrýhanasynda 32 dáriger, Jańaózen qalalyq №1 emhanasynda 19 dáriger, Jańaózen qalalyq №3 emhanasynda 24 dáriger, oblystyq onkologııalyq dıspanserde 13 dáriger, oblystyq jedel jáne shuǵyl medısınalyq járdemde 7 dáriger, «Neıron О́zen» emhanasynda 3 dáriger, oblystyq ftızıopýlmonologııalyq ortalyqta 7 dáriger, Qaraqııa ortalyq aýdandyq aýrýhanasynda 33 dáriger jumys isteıdi. Mańǵystaýlyq stýdentter úshin qolaıly bolǵan bul jańalyq nátıjesinde, 65 jyldyq tarıhy bar medısınalyq ýnıversıtettiń professor oqytýshylary endi Mańǵystaý óńirine kelip qyzmet etetin bolady. Aqtaý qalasyndaǵy «Meıirbıke» medısına kolledjiniń janynan ashylatyn fılıalda oqý júıesi aqyly jáne bıýdjettik baǵytta júzege asyrylady. Aqtóbe qalasyndaǵy M.Ospanov atyndaǵy Batys Qazaqstan memlekettik medısına ýnıversıtetinde 766 stýdent bilim alyp júrse, olardyń arasynda mańǵystaýlyq bolashaq dárigerler de az emes.
Fılıaldyń ashylý saltanatynda ýnıversıtettiń dırektorlar keńesiniń tóraǵasy, medısına ǵylymdarynyń doktory, professor, Medısına ǵylymdary akademııasynyń akademıgi J.Dosqalıev, atalǵan ýnıversıtet rektorynyń mindetin atqarýshy, medısına ǵylymdarynyń doktory, professor E.Ismagýlova, densaýlyq salasynyń ardageri, «Meıirbıke» kolledjiniń dırektory Á.Saǵymbaev, Mańǵystaý oblystyq perınataldyq ortalyǵynyń akýsher-gınekolog hırýrgi Nurlan Jakıev sóz alyp, óńir medısınasy men bilim salasyndaǵy jańalyqqa qoldaý bildirgen óńir basshylyǵyna rızashylyqtaryn bildirip, fılıal jumysyna sáttilik tiledi.
Mańǵystaý oblysy
