Qazaqstan tarıhyn oqyrmandar úshin úırenshikti emes komıks formatynda qaıta basyp shyǵarýdyń bastamashysy bolǵan BAURZHAN foundation qaıyrymdylyq qory. Jańa basylymǵa byltyr elimizde ótken – «Tarıhym-búginim, erteńim!» atty sýretshi-ıllıýstratorlar baıqaýy jeńimpazdarynyń zamanaýı týyndylary engen.
Bes myń danamen jaryqqa shyqqan tyń týyndy kitaphana mekteptermen qatar, balalar úılerine de taratylady. KHAN Comics art-stýdııasy usynǵan bastamaǵa Samruk Kazyna Trust áleýmettik jobalardy damytý qory qarjylaı qoldaý kórsetipti.
Atap aıtqanda, táýelsizdik tarıhyn jańa formatta tolǵaǵan týyndyǵa 70 úzdik ıllıýstrasııa engizilgen. Oqyrmanǵa el ómirinde mańyzy erek mádenı, sporttyq jáne saıası oqıǵalar týraly baıandaıtyn kitaptyń basty keıipkerleri – ulttyq valıýta, Qazaqstannyń Olımpıada oıyndaryndaǵy jetistikteri hám álemdik arenada el mereıin asyrǵan otandyq tanymal tulǵalar. Olardyń ishinde Gennadıı Golovkın, Dımash Qudaıbergen sekildi jerlesterimiz bar.
– Komıkster mańyzdy taqyryptardy nysanaǵa alǵan. Onyń dáleli Qazaqstan tarıhynyń jańa ıllıýstrasııalanǵan úlgide oqyrmanǵa jol tartýy. Bul janrdyń jas býyn arasynda úlken aýdıtorııasy bar jáne jyl saıyn olardyń qatary artyp keledi. Jobanyń maqsaty tek aǵartýshylyq qyzmet qana emes, birinshi kezekte – qazaqstandyq jas sýretshi-ıllıýstratorlardy qoldap, olardyń shyǵarmashylyǵyn kópshilikke tanystyrý, – deıdi BAURZHAN foundation qorynyń jobalyq úılestirýshisi Saıda Ibragımova.
ALMATY
