Palatanyń jalpy otyrysynda «Qazaqstan Respýblıkasynyń keıbir zańnamalyq aktilerine volonterlik qyzmet, qaıyrymdylyq, Memlekettik áleýmettik tapsyrys jáne úkimettik emes uıymdarǵa arnalǵan granttar máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Zańnamany jetildirý sheńberinde granttyq qarjylandyrý júıesin qaıta formattaý jáne ÚEU-men ózara is-qımyldyń jańa tetigin engizý usynylady.
«Granttyq qarjylandyrýǵa keletin bolsaq, grant júıesiniń kelesi túrlerin engizý qarastyrylǵan: qysqa merzimdi, orta merzimdi jáne uzaq merzimdi jobalar. Bul rette granttyń túrine baılanysty qarjylandyrý kólemi, merzimderi, ÚEU-nyń konkýrsqa qatysý sharttary jáne eseptilikke qoıylatyn talaptar aıqyndalady. Árıne, mundaı tásil granttyq qarjylandyrý rásimderin jeńildetedi», dedi Bolat Tilepov.
Ekinshiden, atap ótilgendeı, ózekti baǵyttar boıynsha granttardy josparlaýdyń jańa formatyn engizý josparlanýda. Bul granttardy halyqtyń qajettilikterine tikeleı baǵyttaıdy. Bul tetik «tómennen joǵary» tásilin engizýge múmkindik beredi. Iаǵnı, ÚEU óz jobalary arqyly qoǵamdaǵy ózekti máselelerge jedel den qoıyp, ýaqytyly sheshim qabyldaıtyn bolady.
«Úshinshiden, granttyq saıasatqa salalyq tásildi keńeıtý úshin ortalyq memlekettik organdarǵa operator arqyly granttar berýge quzyretter beriletin bolady. Tórtinshiden, granttardyń tıimdiligin baǵalaý tetigin engizý kózdelgen. Bul úkimettik emes uıymdar qyzmetiniń sapasyn anyqtaýǵa, bıýdjet shyǵystarynyń tıimdiligin qadaǵalaýǵa jáne granttardyń ómirsheńdigin baǵalaýǵa múmkindik beredi», dep tolyqtyrdy Bolat Tilepov.
