Erler arasyndaǵy básekede Nurdáýlet Áıimbetov (58 kılo) pen Parasat Jumabaı (64 kılo) júldegerler qatarynan kórindi. Ekeýi de qola medaldy ıelendi. Áıelder saıysynda da eki samboshymyz jeńis tuǵyryna kóterildi. 57 kılo salmaqtaǵy Gúldana Álmuhambetova aqtyq synǵa deıin alqynbaı jetkenimen, sheshýshi tusta belorýssııalyq Alena Kýpavanyń osal tusyn taba almady. Nátıjesinde, ol kúmis medaldy ıelendi. Al jartylaı fınalda utylǵan Marjan Bızaq (59 kılo) úshinshi orynǵa taban tiredi.
Jaýyngerlik sambodan ótken jarysta Qazaqstannyń ulttyq qurama komandasy mol oljaǵa keneldi. Bizdiń jigitter 1 altyn, 3 kúmis jáne 4 qolany oljalap, atalǵan týrnırdiń jalpy esebinde úzdikter sanatyna qosyldy. Ásirese, Talǵat Jıentaevtyń óneri erekshe rıza etti. +98 kılo salmaqta kúsh synasqan nar tulǵaly qandasymyz barlyq qarsylasyn qoǵadaı japyryp, aqtyq synǵa deıin alqynbaı jetti. Fınalda Talǵat óziniń komandalyq áriptesi Konstantın Rahımovty jeńip, bas júldeni qanjyǵasyna baılady. Bir aıta keterligi, bul sportshylardyń ekeýi de Qostanaı oblysynyń týmalary.
Konstantın Rahımovtan bólek, Erkebulan Qýanǵalıev (58 kılo) pen Málik Baısultanov (64 kılo) kúmispen kúpteldi. Fınalda olar Reseıdiń ataqty balýandarynan aılalaryn asyra almady. Atap aıtsaq, Málik Aleksandr Donsovqa, Erkebulan Vladımır Lımanovqa jol berdi. Al Nurken Dombaev (58 kılo), Ádil Asanhan (58 kılo), Jarashan Samatov (71 kılo) jáne Tımýr Mýkheev (98 kılo) qola medaldy moıyndaryna ildi. Sóıtip, qorytyndy esepte otandastarymyz 1 altyn, 4 kúmis jáne 7 qola medaldy enshiledi.
Mınskidegi jarys kezinde Qazaqstan Respýblıkasy sambo jáne jaýyngerlik sambo federasııasynyń prezıdenti Aıdos Aqjanov Halyqaralyq sambo federasııasynyń vıse-prezıdenti (FIAS) Sergeı Elıseevpen kezdesti. Eki tarap sporttyń osy túrin damytý jolynda qandaı aýqymdy sharýalar atqarylyp jatqany jaıynda aıtyp, aldaǵy josparlarymen bólisti. Sondaı-aq kezdesý barysynda A.Aqjanov bıylǵy Azııa chempıonatyn Aqtaýda jáne Azııa kýbogyn Nur-Sultanda ótkizýge nıetti ekenin bildirdi.
