Alǵashqy kúni bes salmaq dárejesi boıynsha básekeler ótti. 60 kılo salmaqta beldesken eki qandasymyz da jeńis tuǵyryna kóterildi. Maǵjan Shamshadın alǵashqy aınalymda tatamı qojaıyny Egonatan Vekslerdi jeńgennen keıin ekinshi beldesýinde Ispanııanyń tanymal balýany, álem birinshiligi men Eýropa oıyndarynyń júldegeri, qurlyq chempıony Fransısko Garrıgospen kezdesti. Bul básekeniń negizgi ýaqyty teń aıaqtalyp, golden-skorda qazaq balýany ataqty qarsylasynyń aıaǵyn kókten keltirdi. Odan keıin ýkraınalyq Artem Lesıýkten jeńilgen Maǵjan jubanysh beldesýinde ázerbaıjandyq Balabaı Aǵaevtan aılasyn asyrdy. Qola medal úshin tartysta bizdiń jigit Qap taýynyń taǵy bir qyrany Karamat Hýseınovti qapy qaldyrdy.
Al Baýyrjan Narbaev aqtyq synǵa deıin alqynbaı jetti. Ol ızraıldik Lıor Rafaılov, grýzııalyq Temýr Nozadze, nıderlandtyq Tornıke Chakadýa jáne Karamat Hýseınovten basym túsip, fınalda Artem Lesıýkpen kúsh synasty. Ýkraına ókiline qazaq dzıýdoshysynyń áli jetpedi. Sóıtip Baýyrjan kúmis alsa, Maǵjan qolaǵa qol sozdy.
Elimizdiń eń úzdik balýandary Eldos Smetov pen Ǵusman Qyrǵyzbaevtyń ekeýi de bıyl jańa salmaq dárejesinde kúsh synasýǵa bel býdy. Oǵan beıimdelý Eldosqa ońaı bolmady. Tusaýkeser kezdesýinde nıderlandtyq Ivo Verhosterdi utqan ol kelesi kezeńde Eýropa birinshiliginiń qola júldegeri, ıspanııalyq Alberto Gaıteroǵa ese jiberdi. Smetovke qaraǵanda Qyrǵyzbaev táýir kúresti. Ol amerıkalyq Isaıah Ramıres, kýbalyq Orlando Polanso, fransııalyq Daıkı Boýbadan basym túsip, jartylaı fınalda jergilikti dzıýdoshy Barýh Shmaılovqa jol berdi. Úshinshi oryn úshin beldesýde Ǵusman ýkraınalyq Bagdan Iаdovtan jeńildi.
Kelesi kúni taǵy tórt órenimiz jarys jolyna shyqty. Solardyń arasynan tek Jansaı Smaǵulov qana senim údesinen shyǵa aldy. 73 kılo salmaqta beldesken ol grýzııalyq Georgıı Chıkhelızde men ıtalııalyq Djovannı Esposıtony utyp, ózbekstandyq Obıdhon Nomonovqa ese jiberdi. Odan keıin Igor Vandkeni san soqtyryp, qola medaldy enshiledi. Al Danııar Shamshaev (73 kılo), Abylaıhan Jubanazar (81 kılo) jáne Bekádil Shaımerdenov (81 kılo) birinshi kezeńnen keıin-aq kórermender qataryna qosyldy.
Sońǵy kúni alty jerlesimizge jankúıer boldyq. Biraq olardyń Tel-Avıvtegi jarysqa daıarlyqsyz kelgeni birden baıqaldy. 90 kılo salmaqtaǵy Ersultan Muzapparov brazılııalyq Marselo Gomes pen ózbekstandyq Shermuhammed Jandreevti jeńgenimen, kelesi eki básekede ázerbaıjandtyq Mamadáli Mehdıev pen nıderalandtyq Iаsper Smıngke ese jiberdi. Dıdar Hamza tusaýkeser kezdesýinde mońǵolııalyq Pýntsagserennen aılasyn asyra almady. Dál sondaı jaǵdaıdy 100 kılo salmaqta kúresken Erqanat Moldaǵulov pen Islam Bozbaev ta basynan keshirdi. Islam brazılııalyq Maıkl Korrelden utylsa, Erqanattyń ızraıldik Stanıslav Banchýkke áli jetpedi. Sol sekildi asa aýyr salmaqtaǵy Erasyl Qajybaev pen Ádil Orazbaev ta «á» degende súrindi.
Jarys jeńimpazdary: 60 kılo – Artem Lesıýk (Ýkraına), 66 kılo – Barýh Shmaılov (Izraıl), 73 kılo – Hıdaıat Heıdarov (Ázerbaıjan), 81 kılo – Mattıas Kaas (Belgııa), 90 kılo – Mamadáli Mehdıev (Ázerbaıjan), 100 kılo – Ilııa Sýlamanıdze (Grýzııa) jáne +100 kılo – Gýram Týshıshvılı (Grýzııa).
Áıelder arasyndaǵy jarysta 11 dzıýdoshymyz óner kórsetti. О́kinishke qaraı, olardyń eshqaısysynan qaıyr bolmady. Deni alǵashqy aınalymda súrindi. Tek Nazgúl Maratova ǵana jubanysh beldesýine qatysyp, óziniń komandalyq áriptesi Kámıla Berliqashtan basym tústi. Alaıda qola medal úshin tartysta ol fransııalyq Djýlııa Tolofýaǵa jol berdi. Osylaısha, jyldaǵy jaǵdaı taǵy da qaıtalanýda. Biraz ýaqyt boıy halyqaralyq arenada qazaqstandyq dzıýdoshy qyzdar arasynan tek Otgonseseg Galbadrahtyń ǵana tabysty óner kórsetkenin ózderińiz jaqsy bilesizder. Mońǵolııadan bizdiń elge qonys aýdarǵan balýan tatamımen qosh aıtysqan soń óz qyzdarymyzdyń arasynan Galbadrahtyń jeńisti jolyn jalǵastyrýǵa kúsh-jigeri jetetin eshkim tabylmaı otyr.
