«Panorama» seksııasy negizgi konkýrstan keıingi salmaqty júldege jatady. Iаǵnı konkýrstyń qazylar alqasy kınoındýstrııanyń kásipqoı mamandarynan emes, kórermenderden quralǵan. Olar kartınany kórip bolǵan soń birden daýys beredi.
Bıyl koronavırýsqa baılanysty shekteýlerge qaramastan, «Panorama» seksııasyna engen fılmderdi 20 myńnan astam adam kórgen. Kınofestıvaldyń atalǵan seksııasyna 33 elden barlyǵy 29 kartına qatysty.
Turmystyq zorlyq-zombylyq týraly baıandaıtyn «Baqyt» fılmi kórermender men halyqaralyq BAQ tarapynan jyly lebizdi kóp jınaǵan edi. Sebebi úıdegi ozbyrlyq Qazaqstanda ǵana emes, barsha álemde ótkir máselege aınalyp otyr. Aıta keteıik, kınokartına shynaıy oqıǵalarǵa negizdelip túsirilgen.
Fılmde Qazaqstannyń shaǵyn qalasynda ómir súrip jatqan otbasy týraly, uzaq jyldarǵa sozylǵan turmystyq zorlyq-zombylyq pen mahabbatsyz ómir jaıynda baıandalady. Kúıeýi, áıeli men olardyń boıjetken qyzy – úsh negizgi keıipker turmystyq zorlyq-zombylyqtyń bar muńyn, aýyrtpalyǵyn kórsetedi.
Eske salaıyq, buǵan deıin 72-shi Berlın halyqaralyq kınofestıvaliniń Generation (balalar men jasóspirimder týraly fılmder) konkýrstyq baǵdarlamasy bas júldesin rejısser Farhat Sháripovtiń «Shema» fılmi jeńip alǵan bolatyn.
