37 jastaǵy Rıo-de-Janeıro shtatyna qarasty Nıteroı qalasynyń týmasy taı-boksy men djıý-djıtsýdy jaqsy meńgergen. Dos Anostiń aralas jekpe-jekten túrli jarystarǵa túsip júrgenine 20 jylǵy jýyqtap qaldy. Sol aralyqta Rafael 43 kezdesý ótkizip, 30 ret jeńiske jetti. Sol básekeleriniń teń jartysyn merziminen buryn aıaqtady. 2015 jyldyń kókteminde Entonı Pettısti utyp, jeńil salmaqta chempıondyq belbeýdi ıelendi. Sol jyldyń sońynda Donald Serrone uryp jyǵyp, óz ataǵyn qorǵap qaldy. Biraq kóp uzamaı Eddı Alvareske ese jiberip, altyn belbeýden aıyryldy.
Kezinde brazılııalyq sportshy Djeıson Haı, Benson Henderson, Neıt Dıas, Nıl Megnı, Robbı Loýrel, Kevın Lı jáne Pol Felder syndy sańlaqtardy san soqtyrdy. 2014 jyldyń 19 sáýirinde Rafaeldiń Habıb Nýrmagomedovten oısyraı utylǵany da esimizde. Sondaı-aq ol Leon Edvars, Kolbı Kovıngton jáne Kamarý Ýsman sekildi ataqtary alysqa jaıylǵan apaıtósterden taıaq jedi.
28 jastaǵy Rafael Fızıev Jambyl oblysynyń Qordaı aýdanynda dúnıege keldi. Keıinnen Qyrǵyzstanǵa qonys aýdardy. Sporttaǵy mansabyn mýaı-taıdan bastaǵan ol birte-birte jaýyngerlik sambo, djıý-djıtsý, boks jáne grepplıngti meńgerdi. 2015 jyldan beri aralas jekpe-jekke den qoıdy. Alǵashqy alty kezdesýin jeńispen aıaqtady. Sonyń birinde ol qazaq sportshysy Nurjan Tutqaevty tize búktirdi. Dál sol jekpe-jekten keıin Fızıev UFC-de óner kórsete bastady. Tusaýkeser kezdesýinde qyrǵyzstandyq faıter Reseıdiń ókili Magomed Mýstafaevtan utylǵanymen, odan keıingi bes básekeni óz paıdasyna sheshti. Sonyń tórteýinde jarystyń eń úzdik jekpe-jegi dep tanylyp, ol arnaıy bonýsqa ıe boldy. Barlyǵy 12 ret oktagonǵa shyqqan Fızıev tek bir ret qana jeńilis tapty. 11 jeńisiniń segizinde aıqyn basymdyq tanytty. Sonyń jetýinde ol mýaı-taıdyń ádisine salyp, qarsylastaryn uryp nemese teýip qulatty.
Qazirgi kezde Ázerbaıjannyń namysyn qorǵap júrgen Fızıev jeńil salmaqtylardyń UFC reıtınginde 11-orynda tur. Dos Anos altynshy oryndy enshileýde. Eger Rafael osy jekpe-jekte jeńiske jetse, óziniń kózdegen maqsatyna bir taban jaqyndaı túsetini anyq. Iаǵnı taǵy bir-eki sátti básekeden keıin chempıondyq belbeý úshin talasady. Sondyqtan da Qordaıdyń týmasy óz múmkindigin qalt jibermeýge tıis.
Al bul salmaqtyń chempıony brazılııalyq Charlz Olıveıra ekenin esterińizge sala keteıik. Dańqty Habıb Nýrmagomedov úlken sporttan qol úzgennen keıin altyn belbeý úshin ol byltyrǵy jeltoqsan aıynda amerıkalyq Dastın Poremen aıqasyp, úshinshi raýndta ony qylqyndyryp tastady. Sondaı-aq úzdik bestiktiń qatarynda Djastın Geıdjı, Dastın Pore, Beneıl Darıýsh, Islam Mahachev jáne Maıkl Chendler syndy dúlúlder bar. Al bul tizimde ataqty Tonı Fergıýsson jetinshi orynda tursa, atyshýly Konor Makgregor toǵyzynshy oryndy qanaǵat tutýda.
