Elimiz 2022 jylǵy 1 shilde men 31 jeltoqsan aralyǵynda teń tóraǵalyq etedi. Sondaı-aq Qazaqstan kelesi jyldyń basynan bastap BFUG basqarýshy keńesiniń quramyna (BFUG Board) kiredi.
«Qazaqstannyń BFUG-ǵa teń tóraǵalyq etýi bul joǵary jaýapkershilik ári elimizdiń halyqaralyq deńgeıde moıyndalýyn bildiredi. Bolon prosesiniń quramyna 48 memleket kiredi, olardyń ishinde Shveısarııa, Fransııa, Ulybrıtanııa, Ispanııa, Italııa jáne t.b. elder bar. Al Qazaqstan biryńǵaı bilim berý prosesiniń múddelerin bildirý týraly usynysy eýropalyq bilim berý júıesinde qazaqstandyq joǵary bilim júıesiniń bedeliniń artqanyn kórsetedi», dedi QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Qazaqstan Bolon prosesi baqylaý tobynyń teń tóraǵasy retinde sheteldik áriptestermen kúsh-jigerdi biriktirý maqsatynda joǵary bilim salasyndaǵy ózekti máselelerdi halyqaralyq deńgeıde talqylaýǵa bastamashylyq etýdi kózdep otyr.
Onyń ishinde beıresmı, pedagogıkalyq bilim berýdi damytý, bilim sapasyn baǵalaýdy qamtamasyz etý, sonymen birge Ortalyq Azııa keńistiginde Bolon prosesiniń ozyq tájirıbesin tırajdaý máseleleri bar.
Aıta keteıik, Qazaqstan 10 jyldan astam ýaqyt boıy Bolon prosesiniń tolyqqandy múshesi bolyp keledi. Onyń parametrleri joǵary bilim berý júıesine belsendi túrde engizildi. Sondaı-aq Qazaqstan barlyq kórsetkish boıynsha óz mindettemelerin oryndady.
