Sunpaper ónimine suranys mol

Mysaly, osy qaladaǵy kezinde jabylyp qalǵan avtobaza ǵımaratyn almaty­lyq Sunpaper kompanııasy satyp aldy. Kásipkerler iske bilek sybana kirisken: ǵımaratty qaıta qalpyna keltirip, sehtar men qoımalardy iske jaramdy qyldy. Odan keıin Almatydan ón­diristik stanoktar ákelinip, olar bir­tindep iske qosyla bastady. Bir sóz­ben aıtqanda, burynǵy avtobazanyń ornyna zamanaýı turǵyda jabdyqtalǵan sehtary bar zaýyt paıda boldy.

Búginde atalǵan kásiporyn shyǵara­tyn dárethana qaǵazdary men maılyqtar, qaǵaz súlgilerden bastap dárethana jabyndaryna deıingi taýarlar turǵyndar arasynda táp-táýir suranysqa ıe bola bastady. Zaýyt shyǵaratyn ónimniń sapaly bola­tyn basty sebebiniń biri – mundaǵy taýar­lar 100 paıyz sellıýlozadan jasalady.

Qazir Saran qalasyndaǵy zaýyt seksenge jýyq adamdy jumyspen qamtyp otyr. Olardyń arasynda qala tur­ǵyn­dary ǵana emes, jaqyn mańdaǵy aýyl­dyq jerlerdiń adamdary da bar. Ujymda áıelderdiń úlesi basym. Olar negizinen konveıerdiń boıynda turyp, qalaýshy-qaptaýshy bolyp jumys isteıdi. Al er adamdar bolsa, negi­zi­nen sehtardaǵy stanoktardyń toqtaý­­syz jumys isteýin qadaǵalaıdy. Mun­daǵy jumysshylardyń deni jastar. Olardyń jumysqa degen qulshy­nysy da zor. О́ıtkeni qolǵa alatyn turaqty eńbekaqylary ózgelermen salystyr­ǵanda anaǵurlym kóp.

Aıta ketý kerek, kásiporyn basshylary qyzmetkerlerge degen jaǵdaıdyń bárin jasaýǵa tyrysady. Mysaly, mun­daǵy jumysshylar ystyq tamaqty tegin ishedi. Sonymen qatar olardy arnaıy avtobýs úıden jumysqa, jumystan úıge aparyp tastap otyrady. Eń bastysy, kompanııa qajetti degen mamandardy ózderi oqytyp, daıarlap shyǵarady.

Jalpy, kompanııa menedjerlerin naryqtyń tamyryn tap basqan dep aıtýǵa bolady. Nege deseńiz, kásiptiń mundaı túrimen elimizde aınalysatyn kompanııalar joqqa tán deýge bolady. Sondyqtan da, Sunpaper kompanııasy óndirgen maılyqtar, qaǵaz súlgiler, «djýmbo» dárethana qaǵazy sııaq­ty qaǵazdan jasalǵan sapaly ónim­der naryqtaǵy óziniń ornyn oıyp turyp aldy. Qazirgi ýaqytta keregesin keńeıt­ken kásiporynnyń Almaty men elordada bólimsheleri jumys isteı bastaǵan.

Menedjmentti myqty meńgergen kom­panııa bıyl jańa jobany qolǵa alǵaly otyr. Qazir shıkizat shetelden sa­typ alynsa, aldaǵy ýaqytta qaǵaz ne­gizin zaýyt ózinde daıyndaıtyn bolady. Mamandardyń aıtýynsha, munyń ózi kásip­orynnyń qýatyn jylyna 21,4 myń ton­naǵa deıin arttyrýǵa múmkindik beretin kóri­nedi. Mundaı jobalardy júzege asyrý úshin, álbette, myqty qoldaý bolý kerek. Bul turǵyda Sunpaper kompanııasynyń upa­ıy túgel. Naqtyraq aıtqanda, kásip­oryn «Monoqalalardy damytý», «Bıznes­tiń jol kartasy» memlekettik baǵdarla­malarynyń qatysýshysy bolyp sanalady.

Kásiporyn jyldan-jylǵa stanoktar parkin jańartyp, shyǵaratyn ónim túrlerin de kóbeıtip keledi. Jáne olardyń ımporttyq taýarlardan bir de bir kem túspeıtini de ras. Sondyqtan da «Qaraǵandyda jasalǵan» otandyq ónimge degen suranys mol.

Qaraǵandy oblysy,

Saran qalasy