Sýretti túsirgen Erlan OMAR, «EQ»
Meniń ata-anam 1992 jyly Reseıdiń Qorǵan oblysynan Tobyl óńirine qonys aýdaryp, minekı, otyz jyl boldy, Qostanaı oblysynda turyp jatyrmyz. Qazir Qazaqstannyń tolyqqandy azamatymyn jáne óz elimniń shynaıy patrıotymyn dep senimmen aıta alamyn.
Ata-anam alǵash Qostanaı oblysynyń Uzynkól aýdanyndaǵy shaǵyn bir eldi mekenge kóship keldi. Ol kezde biz jastaýmyz. Áli esimde, aýyl halqy bizdi shyn júrekterimen, shynaıy ystyq peıilderimen qýana qarsy alyp, jatsynbaı baýyrǵa tartty. Ata-anammen tanysyp, qonaqqa shaqyrysyp, etene aralasyp jergilikti jurtpen dám-tuzymyz jarasyp ketti.
Reseıde malymyz kóp edi, ákem tórt túliktiń bárin ustady. Qonys aýdararda sonyń bárin alyp keldi. Kele salysymen bizge tegin úı berildi. Eki-úsh saǵattan keıin, syrttan mashına gúrili estilip, aýlamyzǵa kirip kele jatqandaı boldy. Úıden shyqsaq, aýyl turǵyndary shóbin de, sabanyn da, bıdaıy men jemin de ákep tógip jatyr eken. О́stip, kóship kele salysymen, bir qysqa jetetin mal azyǵyn jınap alyp, bir qaryq bolyp qaldyq. Áke-sheshemniń bul jaqtyń qazaqtary qandaı keremet! О́z elińe, óz jerińe eshteme jetpeıdi eken dep tańǵalǵany bar.
О́zim keıin kórshi aýylǵa, úlken áýletke kelin bolyp túsip, 15 jyl boıy ata-enemniń tárbıesin aldym. Osy áýletke kelin bolyp júrip, ana tilimdi úırendim. Joldasym ekeýmiz 29 jyl boıy jarasymdy otbasyn quryp, búginde bala-shaǵamyzdy tárbıelep otyrmyz. Qazir Tobyl qalasyndaǵy Nurjan Naýshabaev atyndaǵy gımnazııada muǵalim bolyp eńbek etip jatyrmyn.
Reseı mektebinde oqyp júrip, Pýshkın men Lermontovtyń kitaptaryn basyma jastap oqıtynmyn. Qazir Abaı, Ybyraı, Nurjan atalarymyzdyń óleńderin oqyp, tanyp-bilip, balalarǵa da ulttyq rýhta tárbıe berip jatyrmyn. Mektep jumysynan tys ýaqytta oblystyq Qazaqstan halqy Assambleıasynyń janynan jumys istep jatqan Analar keńesiniń jumysyna atsalysyp turamyn.
О́zimniń úsh ulym bar. Týǵan uldarymnyń syrtynda, joldasym ekeýmiz taǵdyr tálkegine túsip, ata-analarynyń qamqorlyǵynan aıyrylǵan úsh balany taǵy asyrap aldyq. Qazir tórt ulym, eki qyzym bar. Bári qazaq mektebinde bilim alady. Baqytty anamyn, ózim unatyp isteıtin jumysym bar. О́nege kórip, besiginen túzý ósip kele jatqan alty balam bar. Jaratqannyń osy bergenine shúkir deımin. Búginde nápaqamyzdy adal eńbekpen taýyp, tatý-tátti úlgili otbasy bolyp otyrmyz. Osyndaı baqytqa jetkizgen elime, jerime alǵysym sheksiz. Eń bastysy, elimiz aman, jurtymyz tynysh, aspanymyz ashyq bolsyn. Ana retinde aıtarym, tynyshtyq pen beıbit ómirge eshteńe de jetpeıdi.
Aıtjan KIShKENTAEVA,
N.Naýshabaev atyndaǵy gımnazııa muǵalimi
Qostanaı oblysy,
Tobyl qalasy
