Ádildiktiń jeńerine sengenbiz

Osyǵan baılanysty biz de jumys berýshiler men jumys­shylardyń araqatynasyn rettep otyratyn kásipodaq qurý talabyn bastaǵanbyz. Biraq Syr boıynda munaı óndiretin «KazPetrolGrýpp» kompanııa­sy bas­shylyǵy bizdiń bul tala­­by­­­­myzdy teris kórdi. Qup­ta­ma­ǵa­ny bylaı tursyn, sol úshin jumy­symyzdan bosa­tyl­dyq. Degenmen, alǵan beti­miz­den taımadyq. Eń bas­ty­sy – ádil­diktiń jeńerine sen­dik. Ob­lystyq kásipodaqtar or­talyǵyna, eńbek salasyn­daǵy baqylaý basqarmasyna júgi­nip, qalalyq sot sheshimi arqyly jumysymyzǵa qaıta oraldyq.

Baqandaı tórt aı boıy bizdi sarsańǵa salǵan másele byltyr­ǵy jyldyń qyrkúıek aıynan bastalǵan edi. «KazPetrolGrýpp» munaı kompanııasynda jumys isteıtin bir top jumysshy ózara aqyldasa kelip, kásipodaq uıymyn qurýdy jón dep tapqanbyz. Biraq, bul oıymyzdy basshylyq quptaı qoıǵan joq. Kerisinshe, túrli jolmen qatarymyzdy sıretýge tyrysyp baqty. Ol oılaǵandary iske de asyp jatty. Tek 12 jumysshy ǵana bastapqy oıymyzdan aınymaı, «Qyzylorda oblysy kásipodaq ortalyǵy» arqyly keńester aldyq. Biraq jumys berýshi men jumysshy arasyn­daǵy qarym-qatynasty retteıtin uıym qurýǵa kiriskenimizge aı tol­maı jatyp bizben kompanııa ara­synda jasalǵan kelisim-shart buzyldy. Myna zamanda ju­mys­syz qalý kimge de ońaı emes. Máseleni zańdy jolmen sheshý úshin «Qyzylorda oblysy kásipodaq ortalyǵynan», eń­bek salasyndaǵy baqylaý bas­qar­masynan quqyqtyq kómek sura­dyq. Olar az ýaqyttyń ishinde máse­leni zerttep, quqyǵymyzdy qor­ǵaýǵa belsene aralasty. Kásip­odaq ortalyǵynyń bastamasy­men máselemiz áleýmettik árip­te­stik jónindegi oblystyq úshjaq­ty komıssııanyń qaraýyna shyǵarylyp, kásipodaq alańynda birneshe ret talqylandy.

Jasyratyny joq, kótergen bas­tamańnyń durystyǵyn dálel­deı almaı jigeriń – qumǵa, yntań – unǵa aınalatyn kezder de bolady. Osyndaıda tıisti oryndarǵa júginesiń. Bul rette qalalyq sot­tyń jumys berýshiniń bizben eńbek shartyn buzý áreketin zańsyz dep tanyǵany bizdiń talabymyzdyń durystyǵyn dáleldeı tústi. Sotta bizben eńbek sharty buzylǵanda Eńbek kodeksinen 2020 jylǵy 4 mamyrda alynyp tastalǵan 50-baptyń 3-tarmaǵy negizge alynýy zańsyz ekendigi anyqtaldy. Sýdıa Merýert Toǵyzbaevaǵa isti ádil qarap, bizdiń jumysymyzǵa qaıta turý, májbúrli bos júr­gen ýaqytymyzǵa jalaqy tóleý týraly aryzymyzdy qanaǵat­tandyrǵany úshin alǵys aıtamyz.

Bul sot isi Kásipodaqtar fede­rasııasynyń erekshe nazarynda boldy. «Qyzylorda oblysy kásipodaq ortalyǵy» aýmaqtyq kásipodaqtar birlestigi tóraǵasy Maqsut Nálibaev, onyń orynbasary Marat Báıimbetov, osy ortalyq ókili Maıra Boranbaeva qıyn sátte qasymyzdan tabyldy.

Sonymen ádildik jeńdi. Sot sheshimimen jumysymyzǵa qaıta ornalastyq. Aqpannyń jıyrma biri kúni «vahtaǵa» attanyp kettik. Kásipodaq uıymyn qurý týraly oıymyzdan áli aınyǵanymyz joq. Ujymdaǵy jaǵdaıdy Kásip­odaqtar federasııasynyń baqy­laýynda ustaıtyn boldy. Osy oraıda bizdiń quqyǵymyzdy qor­ǵaýǵa kómek bergen azamat­tar­dyń barlyǵyna Alǵys aıtý kúni ózimizdiń rızashy­lyǵymyzdy jetkizgimiz keledi.

Azamat QALJANOV,

«KazPetrolGrýpp» kompanııasynyń munaıdy daıyndaý jáne aıdaý operatory