Uzaq jyldar boıy Semeıde, Almatyda, Aqtóbede mektepte aǵylshyn tili páninen sabaq berdim. Elimiz egemendik alǵan jyldary Atyraýǵa «Teńizshevroıl» kompanııasyna aýysyp, aǵylshyn tiliniń aýdarmashysy bolyp jumysqa turdym. О́kinetinim, joldasymnyń ómirden erte ketkeni. Ol 1996 jyly qaıtys boldy.
Men týǵan Otanym Qazaqstannyń beıbitshil el bolǵanyn analyq júregimmen tileımin. Ekonomıkamyz órkendep, balalarymyzdyń bilimdi, eńbeksúıgish, otanshyl bolýy úshin eń aldymen úlkender ónege kórsetip, olarǵa baǵyt-baǵdar kórsetý kerek degen pikirdemin. Uldarym men kelinderime, qyzdarym men kúıeý balalaryma bala tárbıesinde áli de kómektesemin.
О́zim Aqtóbe oblysy Qazaqstan halqy Assambleıasy janyndaǵy «Analar keńesiniń» múshesimin jáne «Shatlyk» tatar men bashqurt etno-mádenı birlestigi janynan qurylǵan «Ak kalfak» keńesin de basqaramyn. Bizdiń birlestiktiń negizgi maqsaty – otbasy qundylyǵyn dáripteý. Birlestik músheleri kópti kórgen birneshe ul-qyz ósirgen analar. Bizdiń aldymyzǵa ómirlik qıyn jaǵdaıǵa tap bolǵan jastar kóp keledi. Olarǵa analyq aqyl-keńesimizdi aıtamyz, qaı kezde de asyǵys sheshim qabyldaýdan saqtandyryp, turmystyq qıynshylyqty baıyppen sheshýge keńes beremiz. Minezderi jaraspaı qalyp ajyrasqaly jatqan talaı jasty tatýlastyrdyq. Birlestik músheleri oqý jyly bastalar aldynda jalǵyzbasty analarǵa balalarynyń oqý kıimderi men mektep quraldaryn alyp berýdi dástúrge aınaldyrdy.
1 naýryz – Alǵys aıtý kúnine oraı eń aldymen Qazaqstannyń aspany ashyq, beıbitshilik bolsyn degen tilegimdi bildiremin. Beıbit kúnniń qadirin bileıik, qolymyzdan kelgenshe adal eńbek etip, Otanymyzdyń kúsh-qýatyn nyǵaıtaıyq, salıqaly da parasatty urpaq ósireıik. Árdaıym jan-jaǵymyz tynysh bolsyn dep tileımin.
Biz pandemııanyń álemdi bir ýysqa syıdyryp jibergenine kýá boldyq. Sondaı qıyn kezeńde halyq densaýlyǵy úshin jandaryn shúberekke túıip, óz mindetterin múltiksiz atqarǵan barlyq medısına salasynyń qyzmetkerlerine, úıde otyrǵan balalarymyzdyń bilim alýy úshin aıanbaı eńbek etken muǵalimderimizge alǵys aıtamyn! Kez kelgen qıyndyqty parasattylyǵymyzben, aýyzbirshiligimizben jeńemiz! Elimiz aman, jurtymyz tynysh bolsyn!
Ramzııa ESENBAEVA,
Aqtóbe oblysy QHA janyndaǵy «Analar keńesi» tóraǵasynyń orynbasary, «Shatlyk» tatar men bashqurt EMB janyndaǵy «Ak kalfak» keńesiniń tóraǵasy
