Alaıda tolǵaýy toqsan tirshilikke toly myna zamanda qaýip-qaterdiń aıaqastynda ekenin eskere bermeımiz. Eki jyl buryn eki jasar sábıimdi qabaǵan ıt talap, ólimshi etkeni áli kúnge esimnen keter emes. Sol sátte janymdy qoıarǵa jer tappadym. Balamnyń jaraqaty óte aýyr boldy. Jedel járdem brıgadasyn shaqyrdyq.
Atyraý qalasynyń shetinen jańadan boı kótergen «Juldyz» shaǵyn aýdanynda turamyz. Shaǵyn aýdanǵa jedel járdem brıgadasynyń kelýin kútetin ýaqyt bolmady. Oqıǵa bolǵan jerge polısııa qyzmetkerleri jedel jetti. Ýchaskelik polısııa ınspektory Qanat Ispýsınov jedel járdemdi kútpeı, jaraqaty aýyr balamdy kóligimen oblystyq balalar aýrýhanasyna ala jóneldi. Polısııa ınspektory osylaı jedel áreket etip, jaraqat alǵan balamnyń aman qalýyna qolushyn sozdy.
Qabaǵan ıt balamnyń bas súıegin, qolyn tistegen. Aýrýhana dárigerleri balamnyń denesindegi ıt tistegennen qalǵan jaraqatyna hırýrgııalyq óńdeý júrgizip, tıisti em-domyn jasady. Biraz kún aýrýhananyń travmatologııa bóliminde emdeldi. Al polısııa qyzmetkerleri jedel izdestirý is-sharasyn qolǵa alyp, qabaǵan ıtti de, onyń ıesin de tapty.
Men polısııa ınspektoryna, dárigerlerge balamnyń aman qalýyna kómegin bergeni úshin analyq alǵysymdy bildirýdi jón sanadym.
Áıgerim AIYNǴAZIEVA,
Atyraý qalasynyń turǵyny
