Saıası alańnyń búgingi kúngi eń basty krıterııi bul – zaman talabyna saı qoǵam talaptaryn eskerý. Árbir saıası ınstıtýt, ásirese halyq múddesin negizge alatyn saıası partııalar ózgeristerge beıim bolýy kerek.
Saıası partııa teorııasyna sáıkes partııanyń syrtqy jáne ishki qyzmetteri bar. Ishki qyzmetteri partııanyń qurylymy men qarjylandyrylýyna qatysty. Al syrtqy qyzmeti halyqpen qarym-qatynas ornatyp, ol múddelerdi negizge ala otyryp, bılikke umtylýǵa baǵyttalǵan. Sondyqtan kez kelgen saıası partııanyń basty kúshi – halyq. Partııanyń bar bolýy da halyqqa baılanysty. Halyqtyń muń-muqtajyn jetkizý – partııanyń basty maqsaty.
Partııa usynǵan modernızasııa josparyna saı, halyq únin estýge jáne ony bılik ınstıtýttaryna jetkizý qyzmetin birinshi kezekke qoıyp otyr. Atap aıtar bolsaq, keri baılanys jasaý quraldarynyń tıimdiligin arttyrý, shet aımaqtarǵa partııalyq qabyldaý alańdarynyń shyǵýy, qoǵamdaǵy ahýaldy baǵalaý úshin qurylǵan «Áleýmet» jobasy, azamattardyń usynystarynyń onlaın formatta baqylaı alýyn engizý qolǵa alynbaq.
Partııanyń aýdıtorııasy keń, músheleri kóp, elektoraty bar. Partııa osy aýdıtorııanyń oı-pikirin jınap, máselelerdi saralap, ókiletti kanaldary arqyly sheshýge baǵyttalǵan jumysty turaqty negizge qoıatyn bolsa, qoǵamdaǵy «ystyq núktelerdi» azaıta alady.
Indıra RYSTINA,
Prezıdent janyndaǵy Qazaqstan strategııalyq zertteýler ınstıtýtynyń bas ǵylymı qyzmetkeri
