Aıjaryq – kásibı qylqalam sheberi, onyń kartınalary munaıshylar maqtanyshy, mańǵystaýlyqtar tamsana qarap, kóz toıdyratyn týyndylar. Ol atasynan daryǵan sýretshilik qabiletin joǵary bilimmen ushtap, Abaı atyndaǵy Almaty memlekettik ýnıversıtetiniń kórkemsýret-grafıka fakýltetin bitirgen. Mamandyǵy boıynsha birshama jyl jumys istep, 2008 jyly áke jolymen munaı óndirisi salasyna bet burady. «QazTransOıl» mekemesi Aqtaý bas munaı aıdaý stansasyna jumysqa ornalasady. Munaıshy bolǵanmen, ata qanymen daryǵan tabıǵı talantynan boı da, oı da úzip kete almaǵan Aıjaryq Meıirmanov búginde birneshe kórki men syry saı tamasha kartınalardyń avtory. Mańǵystaýlyq delegasııa quramynda «Etnoaýyl» jobasyna qatysyp, «Mańǵystaý – ashyq aspan astyndaǵy murajaı» kórmesin daıyndaýǵa úles qosqan sýretshiniń ónerpaz qolynan týǵan sýretteri sýret óneriniń qadirin biler jandardan joǵary baǵasyn aldy. Áriptestiń darynyna qýanyp, talantyn aldymen baǵalaıtyn – ásirese munaıshylar. El Táýelsizdiginiń 30 jyldyǵyna Aıjaryq ujymyna usynǵan qart Kaspıı jaǵalaýy beınelengen kórikti kartına búginde munaıshylar ashanasynyń tórin toltyryp tur. Qylqalamynan týǵan syrly boıaýmen kóbine qasıetti atakúldigi – Mańystaýdyń taý-tasyn sóıletip, dańǵaıyr dalasyna án saldyryp, tentek te erke teńizin týlatyp, árbir saı-sala, buta-jýsanynan syr ańdyǵan Aıjaryqtyń bolmysy tabıǵatpen, tarıhpen etene ekendigi birden baıqalady, týǵan jer kórinisi men ótkenine perzenttik ańsary aıtpaı-aq ańǵarylady. Oǵylandy, Bozjyra, Sherqala, Kaspıı, Aıraqty, shartastar – sýretshi kózinen qalys qalmaı, árqaısysy jeke-jeke ádemi, kólemdi kartınaǵa aınaldy. Otbasynda ulttyq ustyndy berik ustanym etken A.Meıirmanov beıneleý ónerinde tarıhı taqyrypqa kóbirek basymdyq beredi.
Aıjaryqtyń jubaıy Ǵalııa – hımııa pániniń oqytýshysy. О́nerde qasıet bolady, ol kez kelgenge emes, óz ıesin, óz qadirin biler jandy taýyp qonady. Ǵalııanyń inisi Sáken de munaıshy. «Qarajanbasmunaı» AQ burǵylaý jáne uńǵymalardy jerasty kúrdeli jóndeý basqarmasy óndiristik bazasynyń operatory Sáken Izdibaev qazaqtyń aqıyq aqyny, Memlekettik syılyqtyń laýreaty Muqaǵalı Maqataevtyń 100-den astam óleńin jatqa oqıdy. Ǵalamtor, uıaly telefon joq keńshar kezinde Sam dalasyna otar qoıdy qaptatyp jiberip keń dala tósinde kitap oqý – shopandardyń súıikti isi. Sáken de kishkentaıynan kitappen syrlasyp, kitaptan mol rýhanı nár alyp óskendigine kúmán joq, óıtkeni Sákenniń aǵasy Bolatbaıdyń kitapqumarlyǵy, oqymystylyǵyna el kýá. Qarapaıym shopannyń kitabı tilmen kósilte sóılep, kimniń qaı kitabynyń qaı betinde ne jazylǵanyn aýzynyń sýy quryp tamsana aýyzsha aıtyp otyratyn Bókeń shopandyqty emes, ǵylym-bilim, ádebıet-rýhanııat jolyn tańdaǵanda tanymal ǵalymdardan esh kem túspesine el senimdi.
– Muqaǵalıdyń aqyndyq qasıeti men óleńderiniń áserliligi ózge aqyndar álemine uqsamaıdy. Sondyqtan maǵan muzbalaq aqynnyń jyrlaryn jattaý qıyn emes. Áriptesterim jumys arasynda óleń oqyp berýimdi suraıdy. Men de shalqar shabytqa kenelip, júrekpen jetkizýge tyrysamyn, –deıdi ol.
Muqaǵalıǵa degen aıryqsha qurmeti bolýy kerek, mańǵystaýlyq munaıshy jigit Muqaǵalıdyń týǵan jerine arnaıy baryp, mýzeıimen tanysqan. Aqynnyń týǵan topyraǵyna taban tıgizip, rýhyna táý etip, murasyn kózben kórýdi kópten maqsat etken Sáken osylaısha bul armanyna qol jetkizdi. Otbasynda tórt bala ósirip otyrǵan áke tuńǵyshyna Aqjol esimin bergen. Búginde Aqjol – Ál-Farabı atyndaǵy Qazaq memlekettik ulttyq ýnıversıteti bıotehnologııa fakýltetiniń 3-kýrs stýdenti. Qajetti mamandyq. Aıtsa aıtqandaı, Aqjoldyń joly aq bolyp, sońynan úshem inisi erdi. О́nerge jany qushtar áke úshemge Muqaǵalı, Shámshi, Tólegen esimderin tańdady. «Bir shańyraq astynda Sáken Seıfýllın, Aqjol Meıirbekov, Muqaǵalı Maqataev, Shámshi Qaldaıaqov, Tólegen Aıbergenov turady» dep ázildeıdi ózderi. Al Sáken aǵa óz jary Balkúmis jeńgeıdi «Lashyn» dep ataıdy eken. Bul da Sákenniń Muqaǵalıǵa degen aıryqsha qurmetiniń dáleli.
Júrekterine óner uıa salyp, kókeılerinde ónerdiń kúmis úni kúmbirlep turatyn jezdeli-baldyzdy qos ónerpaz óndiriste el ıgiligine ǵana eńbek etip júrgen joq, óz áriptesterine, óz ortasyna shabytty áser syılap, ult rýhanııatyna da ózindik úles qosyp júr.
Mańǵystaý oblysy
