Sonymen qatar otyrysta depýtattar arnaýly memlekettik organdardyń qyzmetkerleri men áskerı qyzmetshilerdi áleýmettik qorǵaý jáne olardyń áskerı qyzmetti ótkerýge qatysty keıbir máselelerin retteıtin zań jobasyn qarady.
Bul qujat turǵyn úı tólemderiniń tártibin jetildirýdi jáne arnaýly memlekettik organdardyń qyzmetkerleri men áskerı qyzmetshilerdi, al olar qaza tapqan jaǵdaıda – olardyń otbasy múshelerin turǵynjaımen qamtamasyz etýdi kózdeıdi. Jańa normalarǵa sáıkes endi múgedektigi bar bala asyrap otyrǵan, onyń ishinde otbasynda jasyna qaramastan bala kúninen múgedektigi bar adamdar bar arnaýly memlekettik organdardyń qyzmetkerleri men áskerı qyzmetshilerge ózderi turyp jatqan qyzmettik baspanany óteýsiz alý quqyǵy beriledi. Osy zań jobasyn qabyldaý arnaýly memlekettik organdardyń qyzmetkerleri men áskerı qyzmetshilerdi, olar qaza tapqan jaǵdaıda – olardyń otbasy múshelerin áleýmettik qorǵaýdy jaqsartýǵa jol ashady.
Sonymen qatar zań jobasynda qyzmettik ádepten aınymaý, áskerı múlikti saqtaý jáne taǵy basqa baǵyttar boıynsha áskerı qyzmetshiniń mindetteri tolyqtyrylǵan. Zań jobasy arqyly azamattardy áskerı-patrıottyq tárbıeleýdi aıqyndaý tártibi Úkimetke júkteledi. Osy jáne basqa da normalar «Qazaqstan Respýblıkasynyń keıbir zańnamalyq aktilerine áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasynda jazylǵan.
«Áskerı qyzmetshilerdiń jáne arnaýly memlekettik organdar qyzmetkerleriniń jumystary asa jaýapty ekeni belgili. Sol sebepti olardy jáne olardyń otbasy múshelerin quqyqtyq, materıaldyq jáne áleýmettik qorǵaý – memlekettiń mańyzdy mindetteriniń biri. Sondyqtan qaralǵan zań jobasy áskerı qyzmetshilerdiń turǵyn úı qatynastary salasyndaǵy quqyqtaryn qosymsha retteýdi kózdeıdi. Sondaı-aq áskerı jáne arnaýly memlekettik organdar qyzmetiniń ótkerý tártibin jetildirý máseleleri de qamtylǵan», dedi Máýlen Áshimbaev.
Zań jobasyn qaraý barysynda senatorlar usynylǵan ózgeristerdi qoldady. Sondaı-aq qujatqa áskerı qyzmetshilerdiń quqyqtaryn retteý máselelerine qatysty keshendi tásilderdi qamtamasyz etýge arnalǵan birqatar túzetýler engizildi. Soǵan baılanysty zań jobasyn Májiliske qaıtarý týraly sheshim qabyldandy.
Otyrys kezinde senatorlar ózderiniń depýtattyq saýaldaryn da joldady.
Beıbit Isabaev jumyssyzdyq máselesin tıimdi sheshý úshin elimizde qalyptasqan eńbek naryǵyna tereń ári jan-jaqty taldaý júrgizýdi usyndy.
Murat Baqtııaruly azamattyq joǵary oqý oryndary janyndaǵy áskerı kafedralardyń quramy men qurylymyn ońtaılandyrý jáne halyqaralyq tájirıbeni zerdeleı otyryp, osyndaı áskerı daıarlyq júıesin jetildirý máselesin kóterdi.
Lázzat Súleımen «Dıplommen – aýylǵa» baǵdarlamasyn iske asyrý tetikterin qaıta qaraýdy jáne onyń aıasyn keńeıtýdi eskere otyryp, jobany ári qaraı jetildirýdiń mańyzdy ekenin ekenin aıtty.
Nurtóre Júsip 2023 jyly Beıbarys sultannyń týǵanyna 800 jyl tolatynyna nazar aýdaryp, bul mereıtoıdy halyqaralyq deńgeıde atap ótý úshin bıýdjetten qarjy bólý máselesine toqtalyp ótti.
Bekbolat Orynbekov Jambyl oblysynda aımaqtaǵy sý tapshylyǵyn azaıtyp, azyq-túlik qaýipsizdigin qamtamasyz etýge yqpal etetin 3 jańa sý qoımasyn salý jobalaryn qarjylandyrý máselesin sóz etti.
