Belarýs Ortalyq saılaý komıssııasy referendýmda saılaýshylar tizimine engen azamattardyń 78 paıyzy daýys bergenin habarlady.
Daýys berý bıýlleteninde bir ǵana suraq boldy: «Siz Belarýs Respýblıkasynyń Konstıtýsııasyna engizilgen ózgerister men tolyqtyrýlarǵa kelisesiz be?».
Belarýs Ortalyq saılaý komıssııasy eldiń Konstıtýsııasyn ózgertýdi saılaýshylardyń shamamen 65 paıyzy qoldaǵanyn, al 10 paıyzy bul ózgeriske qarsy daýys bergenin habarlady.
Konstıtýsııaǵa engizilgen ózgeris boıynsha A.Lýkashenkony qylmystyq qýdalaýǵa ruqsat berilmeıdi jáne onyń odan ári prezıdent saılaýyna túsip, eldi basqarýyn jalǵastyrýǵa múmkindik beredi. Iаǵnı túzetýge sáıkes ol prezıdent retinde jasaǵan áreketteri men sheshimderi úshin jaýapqa tartylmaıdy. A.Lýkashenko sonymen birge Belarýs parlamentiniń joǵarǵy palatasynyń turaqty múshesi bolady.
Belarýs halqy, sondaı-aq referendým arqyly ıadrolyq qarýsyz el bolýdan bas tartty. Keńes Odaǵy ydyraǵannan keıin alǵash ret Belarýs jerine ıadrolyq qarýlar qaıta ornalastyrylýy múmkin.
Batys elderi Belarýs úkimetiniń ishki qarsylastaryna qarsy uıymdastyrǵan jappaı qýǵyn-súrginmen qatar ótkizilgen referendýmynyń nátıjelerin moıyndamaıtynyn málimdedi. Jalpy, referendýmnyń Reseıdiń Ýkraına aýmaǵyna basyp kirýimen qatar ótkeni halyqaralyq qoǵamdastyqtyń nazaryn aýdartqany ras.
Ýkraınanyń soltústiginen kirgen ásker Belarýs shekarasynan kelgeni týraly aqparat bar. A.Lýkashenkonyń bul áreketin quptamaǵan Batys elderiniń ókilderi Reseımen qatar, Belarýske de sanksııa salynýy kerek degen pikir bildirdi. Birqatar belarýs sheneýnigine qarsy sanksııalardy Ulybrıtanııa jarııalaı bastady. Odan bólek memleket basqaratyn qarjy uıymdary men bankter de nysanaǵa alynǵan.
Eýroodaq ta bul qadamnan qalys qalmady. Sársenbide Fransııanyń EO tóraǵalyǵy sanksııalar belarýs sheneýnikteri men EO-nyń Reseıdiń Ýkraınaǵa qarsy agressııasyna qatysy bar áskerı qyzmetkerlerge baǵyttalǵanyn málimdedi. Odan bólek Belarýs ekonomıkasynyń belgili bir salalary, atap aıtqanda aǵash óńdeý, metallýrgııa jáne basqa óndiris oryndary shekteýge ilikken.
Osylaısha, kórshiles Ýkraınadaǵy iri daǵdarys kezinde ótken Belarýs referendýmy el Konstıtýsııasyna birqatar túzetý engizýge múmkindik berdi.
