Ulttyq Bank álemdik qarjy naryǵyndaǵy jaǵdaı asa turaqsyz bolyp qalatynyn basyp aıtty.
«Eýropadaǵy qaqtyǵystyń tez arada sheshilmeı, jaǵdaıdyń ýshyǵýy valıýta jáne qor naryǵyna qatty áser etedi», delingen habarlamada.
Halyqaralyq aktıvterge qatysty sanksııalar Reseıdiń ortalyq bankin valıýtalyq ıntervensııa júrgizý múmkindiginen aıyrdy.
«Endi baǵamdy turaqty qylý úshin Reseı Qarjy mınıstrligi rezıdent eksporttaýshylardy ishki naryqtaǵy valıýtalyq kiristiń 80 paıyzyn satýǵa mindettedi. Sonymen qatar, engizilgen sanksııalar men reseılik bankterdi SWIFT júıesinen alyp tastaý valıýta naryǵyn rezıdentterdiń qatysýymen ishki naryqqa jáne jahandyq naryqqa bóldi. Olardyń arasyndaǵy baǵa belgileri ártúrli ekenin eskergen jón. Keshe Mosbırjadaǵy rýbldiń bırjalyq baǵamy bir dollar úshin 105 rýbl deńgeıine deıin kóterildi», dep atap ótti Ulttyq bank.
Ulttyq bank málimdemesinde Reseı Qazaqstannyń negizgi saýda seriktesi ekeni jáne teńge baǵamyna rýbldiń áseri bary aıtylǵan.
«Jaǵdaıdyń turaqsyzdanýyna jol bermeý úshin Qazaqstan qor bırjasynda dollar-teńge valıýtasy boıynsha saýda-sattyq Frankfýrt aýksıony nysanynda ótkizildi. Onyń qorytyndysy boıynsha Ulttyq banktiń valıýtalyq ıntervensııalary 98,1 mıllıon dollardy nemese bir kúngi saýda-sattyqtyń jalpy kóleminiń 61,5 paıyzyn qurady. 1 naýryzdan bastap saýda-sattyq shtattyq rejımde ótedi. 1-5 naýryz aralyǵynda valıýtaǵa suranystyń artýyna baılanysty Ulttyq bank 534,3 mıllıon dollar satty, bul jalpy saýda kóleminiń 60 paıyzyn quraıdy», dep qorytyndylady Ulttyq banktiń baspasóz qyzmeti.
