«Astana Arlans» qonaqta «Team Germany» komandasyn utty

Naýryzdyń 29-nan 30-na qaraǵan túni Germanııada «Team Germany» - «Astana Arlans» komandalary arasynda WSB serııasynyń shırek fınaldyq birinshi pleı-off matchy ótip, bizdiń jasaq 3:2 esebimen utty. Bul týraly egemen.kz habarlady. Rıngke birinshi bolyp 49 kıloǵa deıingi bizdiń Temirtas Júsipov pen alań ıelerin quramyndaǵy rýmyn legıoneri Ovıdıý Berchaný kóterildi. Jekpe-jek qazaqstandyq sportshynyń basymdyǵymen ótti. Esep – 3:0 (50:45, 50:45, 50:45). Al 56 kıloǵa deıingi salmaqtaǵy shaıqasty jurttyń bári asyǵa kútti. Sebebi, nemister jasaǵy sapyndaǵy ırland boksshysy, London Olımpıadasynyń qola júldegeri Maıkl Konlan shyǵatyn edi. Onyń qazaqstandyq Meıirbolat Toıytovpen aıqasy shynynda qyzyqty bolyp shyqty. Biraq tájirıbesi men ataǵy kóp brıtanııalyq boksshy bizdiń birde-bir ataǵy joq, tipti Qazaqstan chempıonatynda júldeger de bolyp kórmegen jigitimizdi 3:0 (50:45, 50:45, 50:45) etip erkin utty. Osylaı komandalyq esep teńesti. Bizdiń sańlaqtar úshinshi shaıqasta ta jol berip qoıdy. Atap aıtqanda, 64 kılodaǵy Ashat germanııalyqtar namysyn qorǵaǵan armıan legıoneri Artem Arýtıýnıannan utyldy – 0:3 (46:49, 47:48, 46:49). Esesine, tórtinshi jekpe-jekte osy kezdesýdegi Qazaqstan komandasy quramyndaǵy jalǵyz legıoner – ýkraın Sergeı Derevıanchenko nemisterdiń rýmyn legıoneri Denısom Robertom Radovanom aıqyn basymdyqpen tize búktirip, jalpy esepti teńestirdi. Ol 3:0 (50:45, 50:45, 50:45) esebimen basym tústi. Sondyqtan bárin 91 kıloǵa deıingi Artýr Mann men Vasılıı Levıttiń kezdesýi sheshti. Qýanyshtysy, Vasıa osy jaýapkershilikti jaqsy sezinip, germanııalyqtar komandasyndaǵy jalǵyz nemis jigitin 3:0 (50:44, 50:45, 50:45) etip utyp shyqty. Sóıtip, birinshi shırek fınalda astanalyqtar 3:2 esebimen utyp ketti. Ekinshi, qarymta kezdesý 5 sáýir kúni Almatyda ótedi. Damır Qojamqul. Derekkóz: egemen.kz. Foto: Sports.kz.