Qaraǵandy oblysynda bir aýyldy sý basyp qaldy

Keshe, 30 naýryz kúni Qaraǵandy oblysy Buqar jyraý aýdanyndaǵy Kókpekti sý qoımasyndaǵy plotınanyń jyrylyp ketýine baılanysty Kókpekti aýylyn topan sý basyp qaldy. Bul týraly Qaraǵandy oblysy tótenshe jaǵdaılar departamentiniń baspasóz qyzmeti habarlady. «Úlken aǵyn sýdyń kelip quıylýy men shlıýz kamerasynyń ótkizý qabiletiniń nasharlyǵynan tasqynnyń plotınadan asyp túsý yqtımaldylyǵy 18 saǵat 30 mınýt baıqaldy», - delingen habarlamada. Osyǵan baılanysty Kókpekti aýylynyń ózenniń jaǵalaýyna ornalasqan 70 úıi (210 adam) men Qaraǵandy qalasyna qarasty Sortırovka eldi mekeniniń 30 úıine (150 adam) jaǵdaı habarlanyp, turǵyndardy basqa jaqqa kóshirý oryn alyp qalýy múmkin ekeni eskertildi. Turǵyndardyń kóshiriletini týraly aqpar Kókpekti ózeni men budan ári Nura ózeni jaǵalarynda turatyn turǵyndardyń barlyǵyna jetkizildi. Ol úıme-úı aralap shyǵý tártibimen júrgizildi. Al 31 naýryz kúni túngi 1 saǵat 30 mınýtta Kókpekti sý qoımasynda plotına  jyrylyp ketti. Nátıjesinde Kókpekti aýylynda 100 úıdi (810) sý basyp qaldy. Sýdyń deńgeıi 1,5-1,8 metrge deıin jetip otyr. Túngi 2 saǵat 45 mınýttan bastap kentte sýdyń deńgeıi qaıta bastady. Tótenshe jaǵdaıdy joıý men sý basqan jerlerdegi turǵyndardy kóshirýge Tótenshe jaǵdaılar mınıstrliginiń 124 adam quramyndaǵy jeke quramy men 15 joǵary ótimdi tehnıka birligi, azamattyq qorǵanys polki, medısınalyq apat bólimsheleri, qutqarýshylar tartyldy. Júrgizilgen jumystardyń nátıjesinde Kókpekti kentiniń 125 adamy qutqaryldy. Qutqarý jumystary barysynda qaza tapqan 4 adamnyń deneleri tabyldy. Qazirgi tańda tótenshe jaǵdaılar qyzmeti qutqarý jumystaryn jalǵastyryp jatyr. Oqıǵa bolǵan jerge Tótenshe jaǵdaılar mınıstri Vladımır Bojko ushyp keldi. Murat Aıtqoja. Derekkóz: Qaraǵandy oblysy tótenshe jaǵdaılar departamentiniń baspasóz qyzmeti. Rásim: e-arhiv.vko.gov.kz.