Qazaqstan tennıs federasııasynyń málimeti boıynsha atalǵan saıys elordadaǵy Ulttyq tennıs ortalyǵynyń arnaıy qurylǵan topyraq tósenishinde uıymdastyrylady. Arena 2500-den astam kórermenge eseptelgen, munda Qazaqstan erler jáne áıelder quramalarynyń oıyndary buǵan deıin de birneshe ret ótkeni belgili. Qazaqstan tennıs federasııasynyń vıse-prezıdenti Iýrıı Polskıı Ulttyq tennıs ortalyǵynyń kezdeısoq tańdalmaǵanyn aıtty. «Elorda korttarynda bizdiń quramalar jaqsy óner kórsetip keledi. Olar Shveısarııa, Argentına, Japonııa, Italııa, Portýgalııa, Nıderland sekildi ataqty qarsylastaryn jeńdi. Sapaly daıyndyq pen jankúıerlerdiń qoldaýynyń arqasynda 20 matchta jeńiske qol jetkizdik. Sondyqtan bul joly da osy tabysty jalǵastyrý úshin bar kúshimizdi salamyz», dedi Iý.Polskıı.
Qazaqstan – Germanııa matchy 15-16 sáýirde ótedi. Jeńimpaz qurama jyl sońynda uıymdastyrylatyn fınaldyq kezeńge joldama alady. Qazaqstan qyzdar quramasy byltyrǵy sáýirde Argentınada kort ıelerin asa tartysty ótken oıynda 3:2 esebimen jeńip, pleı-off kezeńine joldama alǵan bolatyn.
