Juldyzy janǵandar – bolashaq sardarlar

Jýyrda Bilim jáne ǵylym mınıs­trliginiń «Daryn» respýblıkalyq ǵylymı-praktıkalyq ortalyǵy Qorǵanys mınıstrliginiń Áskerı bilim jáne ǵylym departamentimen birlesip 11 synyp oqýshylarynyń arasynda tuńǵysh ret «Sardar» respýblıkalyq keshendi olımpıadasyn ótkizdi. Olımpıada elordadaǵy general S.Nurmaǵanbetov atyndaǵy «Jas ulan» respýblıkalyq mektebiniń aıasynda uıymdastyryldy. Baıqaý eki kezeńde ótti. Alǵashqy teorııalyq satyda oqýshylardyń bilimi matematıka, fızıka, orys tili, qazaq tili, alǵashqy áskerı daıyndyq jáne deneshynyqtyrý pánderi boıynsha testilenip, sarapqa salyndy. Osy synaqta jeńimpaz dep tanylǵan balalar ekinshi kezeńge ótti. Ekinshi tájirıbelik satyda balalar normatıvterdi, AK-74 avtomatyn ishinara bólshekteý jáne jınaqtaý prosesterin oryndap, 3000 metrge, 100 metrge júgirip, tartylyp ózderiniń alǵashqy áskerı daıyndyq, deneshynyqtyrý pánderi boıynsha shama-sharyqtaryn kórsetti. Atap óterligi, olımpıadanyń «Jas ulan» mektebinde uıymdastyrylǵan respýblıkalyq ekinshi qorytyndy kezeńine elimizdiń barlyq óńirlerinen, Almaty jáne Astana qalalarynan, respýblıkalyq áskerı mektepterden birinshi kezeńde jeńimpaz atanǵan 62 oqýshy men olardyń áskerı daıyndyq pánderiniń muǵalimderi qatysty. Olımpıada aıasynda Memlekettik basqarý akademııasynda alǵashqy áskerı daıyndyq pániniń muǵalimderine «Memlekettik tilde saptyq daıyndyq sabaǵyn ótkizý ádistemesi» atty arnaıy semınar ótkizildi. Sonymen qatar, olımpıada qatysýshylaryna Tuńǵysh Prezıdent murajaıyna, «Astana Báıterek» monýmentine, 68665-shi áskerı bólimine saıahat uıymdastyrylyp, «Mega Astana» kınoteatrynda áskerı fılm kórsetildi. «Sardar» respýblıkalyq keshen­di olımpıadasynyń barlyq qatysý­shylaryna sertıfıkattar men estelik syılyqtar berildi. Olımpıadanyń jabylý rásimine oqýshylardy quttyqtap marapattaý úshin Májilis depýtattary general-leıtenant B.Ertaev, general-leıtenant A.Tasbolatov, Qazaqstan Qarýly Kúshteriniń ardageri, general-maıor G.Nosonovskıı, Qorǵanys mınıstriniń orynbasary B.Ábdiraıym, Bilim jáne ǵylym vıse-mınıstri E.Imanǵalıev jáne osy olımpıadanyń negizgi demeýshisi «Ulttyq Qazaqstan ınjınırıng kom­panııa­sy» basqarma bastyǵynyń orynbasary Q. Tilebaldınov qatysty. Báıge bes kúnge sozyldy. Osy kúnder­de qazylar alqasynyń sheshimimen jeńimpazdar men júldegerler, atalymdar boıynsha dıplomdar men gramotalardyń ıegerleri anyqtaldy. Sonymen, «Sardar» respýblıkalyq keshendi olımpıadasynda qazylar alqasynyń sheshimimen «Arystan» mamandandyrylǵan lıseıiniń oqýshysy Nurbek Rysqojaev bas júldege ıe bolsa, «Jas ulan» respýblıkalyq mektebinen Aıbek Qurmanǵalıev, Bernar Erejep, «Arystan» mamandandyrylǵan lıseıinen Aıbek Kerimbek birinshi dárejeli dıplomǵa laıyq dep tabyldy. О́skemen qalasyndaǵy «Jas ulan» mamandandyrylǵan erler lıseı-ınternatynan Nádirbek Nurlybekov, «Jas ulan» respýblıkalyq mektebinen Abylaı Bıqoja, «Arystan» mamandandyrylǵan lıseıinen Shynbolat Qaıyrbekov ekinshi dárejeli dıplomdarmen marapattaldy. Al, úshinshi dárejeli dıplomdar elimizdiń ár óńirindegi bilim ordalarynan kelgen Ulan Sabyrqulov, Asqar Ahmetov, Janbolat Igibaev, Naýryzbaı Serikbaev, Asqar Baltashev, Teljan Áskerjanov syndy myqty oqýshylarǵa tabystalsa, «Eń júırik» atalymynda Ánýar Qurmanǵalıev, Oljas Edik, «Eń kúshti» atalymynda Bektóre Smádil, «Eń tózimdi» atalymy boıynsha Jaqsylyq Tasbolat jeńiske jetti. Aıgúl SEIILOVA, «Egemen Qazaqstan».