«Qylmystyq is «Qazaqtelekom» AQ-nyń qarajatyn jymqyrý faktisi boıynsha tergelip jatyr. Keshe osy boıynsha tıisti aqparat taratyldy. Qazirgi kezde qarajat somasy anyqtalyp jatyr, ol boıynsha birneshe epızod qamtylǵan. Osy oraıda saraptama júrgizilgennen keıin, biz bul somany jarııa etemiz. Degenmen osy iske qatysty mıllıardtaǵan qarajat bar dep aıta alamyn», dedi O. Bektenov Májilistiń jalpy otyrysynan keıin BAQ ókilderiniń saýalyna jaýap bere otyryp.
Sonymen qatar ol Q. Satybaldy áýejaı aýmaǵynda ustalǵanyn aıtty. «Ol Almaty áýejaıynyń aýmaǵynda ustaldy. Ustalǵannan keıin ýaqytsha ustaý ızolıatoryna qamaldy. Tergeý amaldary barysynda qaraımyz, bultartpaý sharasyn sot aıqyndaıdy», - dedi agenttik basshysy.
Buǵan deıin sybaılas jemqorlyqqa qarsy qyzmet «Qazaqtelekom» AQ-qa qatysty laýazymdyq ókilettikti asyra paıdalaný jáne asa iri mólsherde qarjy jymqyrý deregi boıynsha qylmystyq isti tergep jatqany belgili boldy. Qylmys jasady degen kúdikpen Qaırat Satybaldyuly ustalyp, ýaqytsha ustaý ızolıatoryna qamaldy.
