Úkimettiń Telegram paraqshasy málim etkendeı, Densaýlyq saqtaý mınıstri A. Ǵınııat dári-dármekpen qamtamasyz etý týraly aqparat berdi.
«Qazir respýblıkanyń 8 óńirinde - Almaty qalasy, Shyǵys Qazaqstan, Soltústik Qazaqstan, Almaty, Pavlodar, Qostanaı, Aqmola, Túrkistan oblystarynda 5 mlrd teńgeden astam somaǵa dárilik zattardy turaqtandyrý qorlary jumys isteıdi», dedi A. Ǵınııat.
Qalǵan 9 óńir boıynsha iri kóterme dárihana qoımalarynda dárilik zattar qory jasalǵan. Vedomstvo basshysy dári-dármekpen qamtamasyz etý máseleleri erekshe baqylaýda ekenin habarlady. Qazaqstandyq delegasııanyń Ázerbaıjan men Grýzııaǵa saparynyń qorytyndysy boıynsha birlesken qujatqa qol qoıyldy.
QR ındýstrııa jáne ınfraqurylymdyq damý vıse-mınıstri B. Qamalıev qujattyń negizgi maqsaty Transkaspıı halyqaralyq kólik baǵyty boıynsha tyǵyz yntymaqtastyqty damytý jáne biryńǵaı logıstıkalyq kompanııa qurý ekenin atap ótti.
Sondaı-aq Qazaqstan, Ázerbaıjan jáne Grýzııa arasyndaǵy bul bastamaǵa Túrkııa Respýblıkasy qosylýǵa nıetti. Atalǵan baǵyt boıynsha júk tasymaldaý týraly «Qazaqstan Temir Joly» AQ UK basqarma tóraǵasy N. Saýranbaev baıandady. Ol búgingi tańda júkterdiń negizgi nomenklatýralary (kómir, koks, ferroqorytpalar jáne t.b.) boıynsha vagondar men konteınerler arqyly tasymaldaýǵa arnalǵan keshendi tarıf mólsherlemesi bekitilgenin atap ótti. Sonymen qatar N. Saýranbaev buǵan deıin «Atameken» UKP málimdegendeı, Qytaı tarapynyń temirjol tasymaly tarıfterin edáýir ósirgenine qatysty aqparattyń rastalmaǵanyn habarlady.
Búginge deıin kúndelikti ótkizilip kelgen Jedel shtab otyrystaryn endi bıznes-qaýymdastyqtyń ótinishi boıynsha olardyń suraqtarynyń kelip túsýine qaraı aptasyna eki ret ótkizýge sheshim qabyldandy. Jedel shtabtyń kelesi otyrysy 17 naýryzda ótedi.
