Ranking málimetinshe, osy úsh banktiń jıyntyq úlesi eldegi barlyq ekinshi deńgeıli bank (EDB) aktıvteriniń 15,1 paıyzyn quraıdy. Bul kórsetkish bir jyl buryn 14,2 paıyz, al bes jyl buryn 9 paıyzdy quraǵan. Árıne, 15 paıyz – óte aýqymdy kórsetkish. Salystyra aıtar bolsaq, Qazaqstandaǵy qytaılyq bankterdiń EDB aktıvindegi úlesi 2 paıyzǵa da jetpeıdi.
Úsh reseılik banktiń ekeýi – Sberbank pen VTB-ǵa AQSh sanksııasy salyndy, sáıkesinshe sheteldik shekteý bul bankterdiń Qazaqstandaǵy enshiles uıymdaryna da áserin tıgizedi.
«Aktıv kólemi boıynsha Sberbank tek qana qazaqstandyq gıgant Halyk Bank-ke jol beredi. Sońǵy bir jylda Sberbank aktıvi 27,5 paıyzǵa ósip, 2022 jyldyń qańtarynda 4,2 trln teńgeni qurady. Odan keıingi orynda Alfa-bank – 926,9 mlrd teńge. Bir jylda 16,3 paıyzǵa ósken. VTB bank aktıvi bir jylda 36 paıyzǵa ósim kórsetip, 474 mlrd teńgege jetti. Qazaqstandaǵy ekinshi deńgeıli bankter arasynda Alfa-bank pen VTB bank aktıv kólemi boıynsha 11 jáne 12-oryndardy enshileıdi», dep jazady Ranking.
Olardyń nesıeleýdegi qarqyny da joǵary. Qazaqstandyq EDB arasynda reseılik bankterdiń qaryz portfeliniń jıyntyq úlesi sońǵy jylda 15-ten 17,4 paıyzǵa kóterilipti. Nesıeleý kólemi boıynsha Sberbank ekinshi orynda tur – 2,7 trln teńge. Bul – 2021 jyldyń qańtarymen salystyrǵanda 1,5 ese joǵary kórsetkish. Alfa-banktiń qaryz portfeli 36,8 paıyzǵa ósip, 534,8 mlrd teńgeni qurasa, VTB banktiki 24,1 paıyzǵa ósip, 218,2 mlrd teńgeni quraǵan.
«Salymdaǵy reseılik bankter úlesi bir jylda sál ǵana qysqarǵan – 13,7-den 13,6 paıyzǵa. 2022 jyldyń qańtarynda reseılik bankterdegi salymdar 3,5 trln teńgeni qurady. Onyń 2,5 trln teńgesi Sberbankke tıesili. Alfa-banktiń salymy – 618,5 mlrd teńge, VTB banktiki – 338,6 mlrd teńge. Reseılik enshiles bankterdegi salymdardyń 60 paıyzdan astamy – korporatıvtik salymdar. Jáne bul tańǵalarlyq ta qubylys emes. Qazaqstanda shetel azamattarynyń qatysýymen 37,8 myń zańdy tulǵa tirkelse, sonyń 11,5 myńy reseılikter. Sberbanktiń korporatıvtik salymdary – 1,4 trln, Alfa-banktiki – 405,2 mlrd, VTB banktiki – 255,4 mlrd teńge. Bul rette VTB bank jalpy depozıttik portfeldegi korporatıvtik depozıtterdiń eń úlken úlesine ıe – 75,4 paıyz. Sondyqtan da VTB óz klıentterin – zańdy tulǵalardy AQSh dollary jáne eýromen jasalatyn kez kelgen operasııa men esepteý júrgizýlerden ýaqytsha bas tarta turýǵa shaqyrdy», delingen zertteýde.
Al reseılik enshiles bankterdegi bólshek salymdar 10,1-den 10,5 paıyzǵa ósip, 1,4 trln teńgeni quraǵan. Jeke tulǵalar salymy negizinen Sberbankte kóp jınaqtalǵan (1,1 trln teńge). Odan keıin Alfa-bank (213,4 mlrd teńge) jáne VTB bank (83,2 mlrd teńge). Eske salaıyq, Eýroodaq salǵan sanksııalardy júzege asyrǵan SWIFT 12 naýryzda reseılik birneshe bankti ózinen, ıaǵnı halyqaralyq tólem júıesinen ajyratyp tastady.
