Petropavldaǵy Akademııanyń saltanatty ashylý rásimine QR Ulttyq ulan bas qolbasshysynyń tárbıe jáne áleýmettik-quqyqtyq jumystar jónindegi orynbasary, general-maıor Álibek Seralıev, áskerı oqý ornynyń birinshi basshysy bolǵan, otstavkadaǵy general-maıor Amangeldi Dúkenev, otstavkadaǵy polkovnık Sábıt Ahmetov, atalmysh oqý ornyn úzdiksiz 11 jyl boıy basqarǵan, Tuńǵysh Prezıdent - Elbasy Nursultan Nazarbaev atyndaǵy Ulttyq Qorǵanys ýnıversıteti Ulttyq ulan fakýltetiniń basshysy, general-maıor Jumabek Ahmetov, oqý ordasynyń ofıserleri men professorlyq-oqytýshy quramy, ardagerler qatysty.
Saltanatty rásim alańǵa áskerı ınstıtýttyń Jaýyngerlik týyn ákelýmen bastaldy. Osy kúnnen bastap áskerı oqý ornynyń Akademııa atanýyna jáne jańa formasııadaǵy ofıserlerdi daıyndaýyna resmı túrde joldama berildi.
Jeke quramnyń aldynda alǵash sóz alǵan general-maıor Álibek Seralıev osydan shırek ǵasyr buryn Memleket basshysynyń Jarlyǵymen Ishki áskerler, búgingi Ulttyq ulan úshin ofıser kadryn daıyndaıtyn áskerı oqý ornynyń qurylǵanyn atap ótti.
Keıinnen general-maıor Jumabek Ahmetov, ınstıtýt ardagerleri otstavkadaǵy general-maıor Amangeldi Dúkenev pen ostavkadaǵy polkovnık Sábıt Ahmetov izgi tilekterin bildirdi.
Saltanaty shara kezinde qyzmette qol jetkizgen tabystary, áskerı oqý ornynyń qalyptasýy men damýyna ólsheýsiz eńbek sińirgen áskerı qyzmetshiler men ardagerlerge QR Ishki ister mınıstri, Qorǵanys mınıstri, Ulttyq ulan bas qolbasshysynyń jáne Soltústik Qazaqstan oblysy ákiminiń atynan medaldar, gramotalar men alǵys hattar, sondaı-aq merziminen buryn áskerı ataqtar tapsyryldy.
