Túrki akademııasy Eýrazııa ulttyq ýnıversıtetimen áriptestik memorandýmyna qol qoıdy

Búgin, 1 sáýir kúni Túrki akademııasy men L.N.Gýmılev atyndaǵy Eýrazııa ulttyq ýnıversıteti ózara áriptestik týraly memorandým bekitti. Bul týraly Túrki akademııasynyń baspasóz qyzmeti habarlady. Saltanatty jıynǵa Túrki akademııasynyń prezıdenti Darhan Qydyráli, akademııa ǵalymdary men EUÝ rektory Erlan Sydyqov bastaǵan ýnıversıtettiń akademık, professorlar quramy qatysty. Basqosýda sóz alǵan Eýrazııa ulttyq ýnıversıtetiniń rektory tikeleı tórt eldiń basshylarynyń bastamasymen qurylǵan Túrki akademııasynyń mańyzdylyǵyn atap ótti. Al Túrki akademııasynyń prezıdenti Darhan Qydyráli ózi jetekshilik etetin akademııanyń kóptegen sheteldik ýnıversıtetter men ǵylymı ınstıtýttarmen tyǵyz yntymaqtastyq ornatyp, birigip jumys istep jatqanyn tilge tıek etti.Búginde Qazaqstandaǵy túrkologııa mamandarynyń shoǵyry oryn tepken Eýrazııa ulttyq ýnıversıtetimen áriptestik ornatý Eýrazııa keńistiginde túrkologııa ǵylymynyń sony serpinmen damýyna negiz bolady. Taraptar memorandým aıasynda ǵylymı jobalar men ǵylymı-zertteý jumystaryn birlese júrgizý, túrkologııa máseleleri boıynsha birlesken konferensııalar, semınarlar jáne sımpozıýmdar ótkizý,  túrkitaný salasy boıynsha mamandar daıarlaýda eki taraptyń professor-oqytýshylar quramy arasyndaǵy ǵylymı-ádistemelik baılanysty ornyqtyrý, túrkitaný boıynsha magıstratýra jáne doktorantýra júıesinde mamandar daıarlaýda ýnıversıtettiń  aýdıtorııalyq qoryn  birlese paıdalaný, túrkitaný mamandyǵy boıynsha stýdentter men magıstranttardy, doktoranttardy óndiristik jáne oqý tájirıbesi men ǵylymı taǵlymdamadan ótkizýge múmkindik jasaýǵa kelisti.  «18 mamyr kúni kóne túrik jazýy kúnine arnap halyqaralyq forým ótkizgeli otyrmyz. Oǵan álemniń tanymal túrkologtary keledi. Sonymen qatar, tórt el arasyndaǵy arnaıy halyqaralyq kelisimge saı akademııa aıasynan magıstratýra men doktorontýra bólimderi ashylady. Bunyń syrtynda bizdiń jobalarymyzǵa sheteldiń 170-ten astam belgili ǵalymy qatysyp jatyr. Sol akademıkterdiń áleýetin Eýrazııa ulttyq ýnıversıtetiniń stýdentteri tolyq paıdalana alady», — dedi Darhan Qýandyquly. Eýrazııa ulttyq ýnıversıtetiniń rektory Erlan Sydyqov  18 mamyr túrki jazýy merekesi kúnin atap ótý bastamasy Eýrazııa ulttyq ýnıversıtetinde kóterilip, qoldaý tapqanyn jetkizdi. «Túrki akademııasymen birigip ataýly kúndi abyroımen atap ótip, aldaǵy ýaqytta IýNESKO-nyń merekeler kúntizbesine qosý jaǵyna qolǵa alýdy usynamyn»,- dedi Erlan Battashuly.  Túrki akademııasynyń prezıdenti Darhan Qydyráli bolsa «Túrki jazýy kúnin atap ótý týraly Qazaqstannyń ıgi sheshimin Túrki keńesi qýana quptap, túgel túrkige ortaq mereke etý jaıyn biraýyzdan qoldaǵanyn» atap ótti. Jalpy, L.N.Gýmılev atyndaǵy Eýrazııa ulttyq ýnıversıteti ashylǵan kúnnen beri túrkologııa salasynyń damýyna erekshe kóńil bólip keledi. Kúltegin  eskertkishi kóshirmesiniń  de eń alǵash dál osy ýnıversıtetten oryn alǵanyn aıta ketýimiz kerek. Dastan Kenjalın. Derekkóz: Túrki akademııasy. Foto: Túrki akademııasy.