«Kóp túkirse kól» degendeı, áleýmettik jeliniń áleýetin tıimdi paıdalanǵan azamattar muń-muqtajy kóp talaı taǵdyrǵa arasha bolyp júr. Jeke qorlardyń kómegimen qanshama jannyń baspana jyry baıypty sheshimin taba bastady. Bul izgilikte shekara bolmaıtynynyń dáleli. Búgingi áńgime ózegi – halyq ishinde keń tanylyp, myńdaǵan jandy qýantqan «Hareket» qaıyrymdylyq qory.
«Myń teńgege – baspana» degen ataýmen bastaý alǵan joba az ýaqytta qoǵam qoldaýyna ıe boldy. Atalǵan ujymnyń bastamashy bolýymen tórt jyl ishinde muqtaj jandarǵa 600-den astam baspana kilti tabystalǵan. Bul shynynda da kóńil qýantarlyq kórsetkish. Sonymen «Hareket» qaıyrymdylyq qory qalaı quryldy?
Qor 2017 jyldyń qyrkúıek aıynda resmı tirkelgen. Joba avtory Gúlmıra Muqanqyzy sol jyly óziniń áleýmettik jelidegi paraqshasyna bylaı dep jazyp edi: «Musylman baýyrlar, osy feısbýkte bir jazbany kózim shalyp qaldy. Onda: «Meniń 3000 dosym bar eken. 1000 teńgeden jınap «chernyı kassa» oınasaq qalaı bolady?» dep jazypty. Sol jazba maǵan oı saldy. Árdaıym jetim-jesirler jaıly jazyp júrmiz. Sol jetimderdiń basynan sıpaı aldyq pa? Jesirlerge qolushyn bere aldyq pa? Ash otyrǵan kórshińizdi tamaqtandyrdyńyz ba? Biz qandaı jaqsylyq jasadyq? Alla taǵala Quranda: shańnyń tozańyndaı jaqsylyq jasasań ony kóresiń demep pe edi... Ol jaıly ýaǵyz-ósıet qanshama. Qadirli baýyrlar, meniń oıym mynadaı: ár aıda 1000 teńgeden ortaǵa salyp, 5 myń adam 5 mıllıon jınasaq, bir muqtaj janǵa úı salyp berer edik. Múmkin qaıyrymdy jandar odan kóp bolyp jatsa, eki adamǵa qolushyn sozarmyz. Ol kisilerdiń qýanysh kóz jasyn kórý qandaı baqyt deseńizshi. Jaqsylyq jasap jaryssaq. Sizder qalaı oılaısyzdar?.. Ol kisilerdi tabýǵa meshitter kómekteser. Jer-jerden eriktiler tabyla jatar. Jylyna 15-20 adamnyń armanyna jol ashsaq zor qýanysh emes pe...».
Jaqsylyqqa baǵyttalǵan sapardyń túbi sara. Osy bir kóńil terbeter qarapaıym jazba birneshe myń adamnyń taǵdyryn jaqsy arnaǵa burdy. Gúlmıra hanymnyń júrekten shyqqan sózi júrekterge jetti. Sol tusta ıgi usynysty jeli qoldanýshylary biraýyzdan qoldap, alǵashqy jınalǵan 1 mln 600 myń teńgege Sátbaev qalasynda 8 balasymen jertólede turyp jatqan otbasyǵa baspana kilti berildi. Osylaısha halyqtyń demeýimen, muqtaj jandarǵa, jetim-jesirlerge, múmkindigi shekteýli kisilerge, jalǵyzbasty analarǵa, t.s.s. jandarǵa úı nemese jer telimin alyp berý, úı salýyna kómektesý isi úzdiksiz jalǵasyp keledi.
Dúnıeni dúrliktirgen pandemııa kezinde qarym-qatynas toqtady. Biraq «Hareket» qorynyń jumysy toqtaǵan joq. Eriktiler kún-túnge qaramaı qınalǵan jandarǵa qolushyn sozdy. Shetelden tynys alý qurylǵylaryn ákelip dert dendegen talaı janǵa dem bergenine el kýá.
Qoǵamdaǵy túıtkildi máselelerdi astarly ázilmen túırep, qazaqy qalypqa saı sharapat jolyn nasıhattap júrgen «О́ner qyrandary» teatrynyń esimi «Hareket» qorymen qatar atalady. Qoǵam qabyldaýynda bul ekeýi egiz uǵymǵa aınalǵan. Sebebi qor alǵash jumysyn bastaǵannan onyń jarnamasyn jurtshylyqqa jetkizip kele jatqan óner ujymynyń ókilderi ár baspana kilti tabystalǵan saıyn kóńilderin keremet sezim kerneıtinin aıtady.
– Jaratylystyń ishinde adam ǵana erteńine alańdap ómir súredi. Keıde boıymyzdan torǵaılardyń táýekelindeı táýekel tabylmaı qalyp jatady. «Hareket» qaıyrymdylyq qorynda qyzmet ete júrip sondaı jandardy kórdik. Shynymen de dál sol torǵaı sekildi jaratqanǵa táýekel etip ómir súretin jandardy kórdik. Júregi tynysh. «Qalaı ómir súrip jatyrsyzdar, bala-shaǵalaryńyzdyń erteńi qalaı bolar eken?» degen saýalymyzǵa: «Jalǵyz senerimiz – Qudaı. Adamdar bizge qaıtara almaıdy dep qaryz bermeıdi, kórshige barsań, suraı beredi dep kórgisi kelmeıdi, turmystyń tapshylyǵynan aǵaıyn da alystap ketetin jaǵdaılar bolady. Mundaıda taǵy da bir Qudaıǵa jalbarynyp, keler kúnnen úmit kútemiz. Tirnektep tapqanymyzdy jaldamaly páter ıesiniń qaltasyna quıyp otyrmyz, qor jınap jeke baspanaǵa qol jetkizýdiń aýyly alys» dep ún qatady. Solardyń úmiti aqtalsyn degen appaq nıetpen «Hareket» qaıyrymdylyq qory ashylǵan bolatyn. Tórt jylda myńdaǵan jannyń armany oryndaldy. Bári de izgilikke ińkár aǵaıynnyń yqylasy, halyqtyń qoldaýy. Baspana kiltin tabystaǵan sátte kishkentaı jáýdirkózder janaryna jas alyp, bizdi qushaqtap, alǵysyn aıtady, – deıdi «О́ner qyrandary» teatrynyń jetekshisi ári «Hareket» qaıyrymdylyq qory quryltaıshylarynyń biri Madııar Serikbaev.
Árbir kelip túsken ótinimdi qordyń komıssııa quramy saralaı otyryp naǵyz kómekke zárý jandardy tańdap alady. Qordyń quryltaıshylary qatysqan jalpy jıynda kelesi kómek kimge beriletini anyqtalady. Satyp alynǵan úı nemese jer telimi áleýmettik jelide jarııa túrde kórsetilip otyrady. Bul qaıyrymdylyqqa ún qosqan halyqtyń senimi úshin qajet. Saýaptan úmit etken árbir azamat qordyń shotyna 1000 teńgeden salyp otyrady. Múmkindigine saı aýqymdy kómek kórsetip júrgen atymtaı jandar da barshylyq.
Halqymyz asyǵa kútetin Naýryz merekesiniń túpki máninde meıirbandyq, jylylyq, baýyrmaldyq jatyr. Sol sezim qaıta kelgen kóktemmen birge búr jaryp júrekterge sáýle quıdy. Sol sáýleden nár alǵan izgi shýaq jandar ún qosqan «Hareket» qory tarapynan qaıyrym kórgen qanshama ananyń júzine shattyq uıalady, olardyń júrekteri jyly tósek, jyly úıde tynyshtyq tapty. Myńdaǵan jetkinshek máre-sáre bolyp shyn qýandy. Olar búgin óz úıinde alańsyz ósip jatyr. Talaılardyń alystaǵy armanyn jaqyndatqan jaqsylyq jasaǵyna jańa jylda jaratqan jar bolǵaı!
ALMATY
