Memleket basshysy Qasym-Jomart Toqaev qazaqstandyqtardy Naýryz meıramymen quttyqtap, bul kún bereke men birliktiń, meıirimdilik pen ózara syılastyqtyń qasıetti merekesi ekenin atap ótti. Prezıdent búgingi mereke jańa ózgeristerge bastama bolýyna, al Qazaqstan qýatty ári uıymshyl memleket bolyp damı berýine tilektestik bildirdi.
Sondaı-aq, elorda turǵyndaryn Naýryz merekesimen qala ákimi Altaı Kólginov quttyqtady.
«Qala turǵyndary bul merekeni ylǵı da erekshe yqylaspen kútedi, sol sııaqty jurttyń bir birine kómek qolyn sozýy otbasylyq jáne mádenı qundylyqtardyń, halyq birliginiń jarqyn kórinisi bolatynyn aıtty. Mereke kúnderi biz áleýmettik az qamtylǵan azamattarǵa azyq-túlik sebetterin taratý aksııasyn toqtaýsyz jalǵastyramyz. Qalada Naýryz meıramy atap ótiletin 20-dan astam oryn, sol sııaqty eldi mekenderde de oryndar anyqtaldy», dedi elorda ákimi.
Basty mádenı-sporttyq is-sharalar «Qazaq eli» alańynda, «Jastar» saıabaǵynda, Jazýshylar alleıasynda, «Atatúrik», «Kóktal» saıabaqtarynda, EKSPO jáne Demalys Promenade alańdarynda uıymdastyryldy. Budan basqa, Naýryz meıramyna oraı uıymdastyrylǵan oryndar qalanyń barlyq eldi mekeninde ótkizildi.
«Búgin Ulttyq mereke – Naýryz meıramyna oraı is-sharalar ótkizilýde. Baıqońyr aýdany boıynsha merekelik is-sharalar 5 orynda – «Atatúrik» saıabaǵynda, Jazýshylar alleıasynda jáne úsh eldi mekende ótkiziledi. Mereke kúni saıabaqta kıiz úıler tigilip, konserttik baǵdarlama uıymdastyrylyp, ulttyq sport túrlerinen jarystar ótkiziledi. Ár kıiz úıde teatrlandyrylǵan qoıylymdardy tamashalaýǵa bolady, tańerteń qonaqtarǵa Naýryz kóje men palaý taratyldy», dedi Baıqońyr aýdany ákiminiń orynbasary Shuǵyla Qudaıbergenova.
Qala boıynsha belgilengen oryndardyń bárinde altybaqan, ulttyq naqyshta bezendirilgen kıiz úıler ornatylyp, dástúrli taǵamdar – baýyrsaq pen Naýryz kóje kelgen jurtqa taratyldy. Qonaqtar úshin konserttik baǵdarlama da uıymdastyryldy.
Dástúr boıynsha ulttyq sport túrlerinen jarystar da ótkiziledi. Tilek bildirýshiler asyq atý, qol kúresi, arqan tartý, gir kóterý boıynsha synǵa túsedi.
«Bıyl elordamyzda naýryz meıramy úlken aýqymda toılanyp jatqany qýantady. Bári óte keremet uıymdastyrylǵan, Naýryz kójeden dám tattyq. Keremet konserttiń kýágeri bolyp, jarystarǵa da qatystyq. Kún men túnniń teńelgen, ulystyń uly kúnin atap ótý úshin merekege otbasymyzben keldik», dedi Nursultan esimdi qala turǵyny.
Búgingi merekege ózge aımaqtardan da, tipti shetelderden de arnaıy qonaqtar qatysty.
«Meni osyndaı keremet merekege arnaıy shaqyrdy. Men Nur-Sultanda bolǵanyma óte qýanyshtymyn. Qazaqstandyqtardy Naýryz merekesimen quttyqtaımyn! Bárińizge zor densaýlyq, elimizge jarqyn bolashaq pen tynyshtyq tileımin!», dedi mereke qonaǵy Sanjaı Bıdı.
Aıta ketsek, qala turǵyndary da bastama kóterip, óz aýlalarynda kıiz úıler tigip, dastarqan jaıyp, merekeni birlesip atap ótýge úles qosty. Kelgen jurtqa samaýryn sháıi, baýyrsaq jáne palaý taratyldy.
Bıyl elorda ákimdiginiń bastamasymen Naýryz merekesi «Qaıyrymdy ister» uranymen ótti.
Mereke aıasynda qalada ıgi isterge arnalǵan aksııalar uıymdastyrylyp, muqtaj jandarǵa azyq-túlik sebetteri taratylady. Azyq-túlik jıyntyǵyn 1 naýryzdan bastap myńnan astam muqtaj otbasy aldy. Qaıyrymdylyq is-sharasyn júzege asyrýǵa kásipkerler, eriktiler jáne qala turǵyndary kómek kórsetedi. Ulttyq Naýryz meıramy qarsańynda azyq-túlik jıyntyǵy 600-den astam otbasyǵa taratyldy, olardyń arasynda áleýmettik az qamtylǵan, kópbalaly otbasylar, sondaı-aq jalǵyz turatyn zeınetkerler jáne halyqtyń ózge de áleýmettik sanattary bar. Mundaı aksııalar 1 naýryz – Alǵys aıtý kúni, 8 naýryz – Halyqaralyq áıelder kúni ótkizildi, onda 500-den astam otbasyǵa azyq-túlik sebeti úlestirilgen bolatyn.
