Ulttyq kitaphanada depýtattar, ata-analar, qalalyq bilim basqarmasynyń mamandary, ustazdar qaýymy sońǵy jyldarda qoǵamdy erekshe tolǵandyryp otyrǵan bala tárbıesi, býllıng, otbasyndaǵy zorlyq-zombylyq taqyrybyn talqylaý maqsatynda dóńgelek ústelde bas qosty.
Jıynda «Senimen Bolashaq» respýblıkalyq ata-analar qoǵamdyq birlestiginiń quryltaıshysy Nurken Asanov, Parlamenti Senatynyń depýtattary Dınar Núketaeva jáne Dana Nurjigit, Májilis depýtaty Irına Smırnova, «Senimen Bolashaq» respýblıkalyq ata-analar qoǵamdyq birlestiginiń tóraǵasy Raqymbek Jolaev, Adam quqyqtary jónindegi zańger, PhD Halıda Ajıgýlova, taǵy da basqa qoǵam qaıratkerleri men bilim berý men tárbıe ortalyqtarynyń mamandary ózekti taqyrypqa oraı oı bólisti.
Birlestik tóraǵasy Raqymbek Jolaevtyń aıtýynsha, óńirlerde ata-analarmen tyǵyz baılanys ornatý maqsatynda kóptegen sharalar uıymdastyrylýda. Qazirgi kezde 13 myńnan astam múshesi bar birlestik otbasyndaǵy tárbıe, ata-ana bolýdyń zamanaýı talaptary, balamen til tabysý, psıhologııalyq keńester berý arqyly qoǵamdaǵy býllıng, sýısıdtiń aldyn alý boıynsha keshendi jobalardy júzege asyryp keledi.
