Ýkraınadaǵy qarýly qaqtyǵys bastalǵaly bir aıdan asty. Osyǵan deıin birneshe kezdesý ótkizgenimen, taraptar ortaq kelisimge kelmedi. Eki memleket basshylary kezdespeı, másele sheshilmes degen de pikirler aıtylýda. Alaıda Reseıdiń syrtqy ister mınıstri S.Lavrov prezıdentter – Vladımır Pýtın men Volodımır Zelenskııdiń kezdesýi dál qazir tıimdi nátıje bermeıdi degen pikir bildirdi. Serbııalyq BAQ-qa pikir bildirgen S.Lavrov eki kóshbasshy arasyndaǵy kezdesý tek eki tarap negizgi máselelerge qatysty ortaq sheshimge kele bastaǵanda ǵana ótýi kerek deıdi. Ol aldaǵy ýaqytta ótýi múmkin Ýkraına men Reseı arasyndaǵy kelissózderdiń jemisti bolǵanyn qalaıtynyn jetkizdi.
Jaqynda Reseı men Túrkııa prezıdentteri eki jaqtyń delegasııalarynyń kelesi kezdesýin Ystanbulda ótkizýge keliskeni belgili boldy. Memleketter basshylary telefon arqyly sóılesip, Reseı-Ýkraına qaqtyǵysyn talqylaǵan. «Áńgime barysynda prezıdent R.Erdoǵan atysty toqtatý, sondaı-aq Reseı men Ýkraına arasynda tez arada beıbitshilik ornatý men aımaqtaǵy gýmanıtarlyq jaǵdaıdy jaqsartý qajettiligin atap ótti», delingen Túrkııa prezıdentiniń ákimshiligi taratqan aqparatta. Málimdemede Túrkııa jaǵdaıdy retteýge tolyǵymen yqpal etýge daıyn ekeni basa aıtylǵan.
Reseı delegasııasynyń basshysy Vladımır Medınskıı kezdesý 29-30 naýryzda ótetinin habarlaǵan.
Ýkraına prezıdenti Volodımır Zelenskıı Reseımen kelissózderdiń kelesi kezeńinde basymdyq eldiń egemendigi men aýmaqtyq tutastyǵyna beriletinin málimdedi. V.Zelenskıı Ýkraınanyń ıadrolyq qarýsyz jáne beıtaraptyq mártebesin, qaýipsizdik kepildikterin talqylaýǵa daıyn dedi. Alaıda kelisim sóz júzinde emes, naqty bekitilgen qujat bolýy kerek deıdi Ýkraına basshysy.
Ýkraınada Marıýpol sekildi qorshaýda qalǵan qalalardyń, shabýyldan qorǵaný úshin jertólelerdi panalaǵan turǵyndardyń jaǵdaıy qıyn ekeni aıtylýda. Alaıda dúısenbide qorshalǵan qalalardan beıbit turǵyndardy evakýasııalaý úshin gýmanıtarlyq dálizder ashylmaıtyny habarlandy. Ýkraınanyń vıse-premeri Irına Vereshýk bul sheshim dálizderdiń qaýipsizdigin qamtamasyz etý múmkin bolmaǵandyqtan qabyldanǵanyn aıtty. Reseı áskeriniń shabýyly beıbit turǵyndardy qorshaýǵa alynǵan qalalardan evakýasııalaýǵa kedergi keltirip, bul prosesti haosqa aınaldyrǵan. Marıýpol meri Vadım Boıchenko qala gýmanıtarlyq apattyń aldynda turǵanyn jáne ony tolyǵymen evakýasııalaý kerek ekenin eskertti. Qalada 160 myńǵa jýyq beıbit turǵyn elektr jaryǵynsyz qalǵan.
Halyqaralyq Qyzyl Krest komıteti de qorshaýda qalǵan Marıýpolge jete almaı jatqanyn málimdedi. Uıym músheleri ol úshin Reseı men Ýkraına tarapy qaýipsizdikke kepildik berýi kerek deıdi. Alaıda bul múmkin bolmaı turǵanǵa uqsaıdy.
BUU osy ýaqytqa deıin kem degende 1 100 beıbit turǵyn qaza boldy jáne 10 mıllıonnan astam adam kóshirildi degen derek jarııalady. Ýkraına Reseıdi Marıýpol qalasynan myńdaǵan beıbit turǵyndy kúshtep kóshirdi dep aıyptap otyr. Reseı Marıýpoldiń shyǵysyndaǵy Bezymıannyıdaǵy ýaqytsha lagerde 5 000-ǵa jýyq adamdy ornalastyrady dep habarlady.
Al Reseı Federasııasynyń qorǵanys basqarmasy Ulttyq ortalyǵynyń bastyǵy, general-polkovnık Mıhaıl Mızınsev bir táýlik ishinde Ýkraınadan Reseıge 19 694 beıbit turǵyn evakýasııalandy dep habarlady. Onyń aıtýynsha, Reseı áýe kúshteri qaýipsizdik sharalaryn saqtaı otyryp kún saıyn beıbit turǵyndar men sheteldik azamattardyń ómirin saqtaǵan. M.Mızınsev arnaıy operasııa bastalǵannan beri Reseıge 439 420 adam evakýasııalaǵanyn, olardyń 91 673-i balalar ekenin, RF memlekettik shekarasynan 51 638 jeke avtokólik ótkenin aıtty.
Ýkraına men Reseıdiń taratqan aqparattardaǵy alshaqtyqty osyǵan deıin aıtqanbyz. Sondyqtan bul sandardy naqty rastaý múmkin emes. Osyǵan deıin Belarýs aýmaǵynda, keıin onlaın ótken kelissózder aıtarlyqtaı nátıje bermegeni belgili. Endigi kezek – Túrkııa astanasynda. Kezekti kelissózdiń nátıjesi qandaı bolatynyn ýaqyt kórsetedi.
