Metallýrgııa kombınaty iske qosyldy

Qolǵa alynǵan bastamalardyń deni mıneraldy shıkizat óndirý men óń­deýge qatysty. Qazirdiń ózinde jemi­sin bere bastaǵan jobalar da bar. Mysal­ǵa, jaqynda Qaratal aýdanynda metal­lýrgııalyq kremnıı óndiretin zaýyt ashyldy. «MK «KazSilicon» seriktes­tiginiń joǵary markaly metallýrgııalyq kremnıı óndiretin zaýytyn iske qosýǵa 3,9 mlrd teńge ınvestısııa tartylyp otyr. Al kásiporyn tolyq qýatynda ju­mys­qa kiriskende 200 adam turaqty eńbek­pen qamtylady. Munan bólek, kom­bınatqa qajetti maman daıarlaýǵa erekshe mán berilip, osy aýdandaǵy Bastóbe aýylyndaǵy mamandandyrylǵan kolledjde elektromonter men elektr gaz dánekerleýshi kásibin ıgerýge 48 maman arnaıy daıarlanyp jatyr. Iаǵnı dýaldy oqytý aıasynda kombınattyń bazasynda tehnık-mehanıkter men kópirli kran operatorlaryn qaıta daıarlaýǵa múm­kindik jasalady.

Buǵan deıin oblys ákimi Qanat Bozym­baev jańa ınvestorlarmen kezdesip, osy jobanyń jaı-japsaryn talqylaǵan bolatyn. Sonyń nátıjesinde birshama jyl toqtap turǵan kásiporynǵa az ýaqyt ishinde jańǵyrtý jumystary júrgizilip, qysqa merzimde iske qosyldy. Jańǵyrtý barysynda qurylys-jóndeý, jabdyqtar men peshti qaıta iske qosý jumystary júrgizildi.

– Biz birshama jyl toqtap turǵan KazSilicon metallýrgııa kombınaty­nyń qalpyna keltirilip, qaıta iske qosyl­ǵa­nyna kýá bolyp otyrmyz. Jańa ınves­torlar kombınattyń ekinshi tynysyn ashyp, qysqa merzim ishinde jańǵyrtýdan ótkizdi. Kombınatqa qajetti mamandar osy Qaratal aýdanynyń ózinde daıarlanady. Jergilikti mamandar daıarlaý isi bastalyp ta ketti. Osy sharalardyń barlyǵy Prezıdenttiń halyqtyń ál-aýqatyn arttyrý, turaqty jumys oryndaryn ashý týraly tapsyrmasyn oryndaý maqsatynda júzege asyrylyp otyr, – deıdi oblys ákimi Qanat Bozymbaev.

KazSilicon metallýrgııa kombınaty Qaratal aýdanynyń Jylybulaq aýyly­na taıaý jerdegi «Sarykól» ken or­ny­nan alynatyn jelilik kvars túrin­degi shıkizatpen ózin qamtamasyz etedi. Jalpy, kremnıı álemde metallýr­gııa salasynda, sol sııaqty joǵary dáldik­tegi elektr qurylǵylary óndiri­sinde paıdalanylatyndyqtan úlken suranys­qa ıe. Bul kombınatta jylyna 6 myń tonna metall óndiriledi. Qazaqstandyq mazmunnyń úlesi 80 paıyz bolatyn da­ıyn ónimder álemniń jıyrmaǵa jýyq eline eksporttalmaq.

Investısııa demekshi, bıyl Panfılov aýdanynda da quny 4,6 mlrd teńgeni quraıtyn 19 jobanyń negizi qalanbaq. Onyń ishinde «Qorǵas-Shyǵys qaqpasy» arnaıy ekonomıkalyq aımaǵynda 3 mlrd teńge bolatyn 5 jobany iske asyrý kózdelgen. Búginde Jibek jolyn damytý jónindegi halyqaralyq kompanııa jylyna 450 myń dana aıaq kıim men arnaıy kıim shyǵaratyn kásiporyn qurylysyn bastady. Al «KAZ-AKVA» kásiporny 300 tonna balyq ónimderin daıyndaıtyn jáne «Arystan ı Ko» kompanııasy táýligine 25 tonna júgeri dánin keptiretin óndiristi damytýdy josparlap otyr.

Almaty oblysy