Respýblıkada «Birgemiz Bilim» jalpyulttyq jobasy iske asyryla bastady. Onyń negizgi maqsaty – volonterlerdi tartý arqyly turǵyndardyń, onyń ishinde aýyldyq jerlerdegi halyqtyń sıfrlyq, qarjylyq, kompıýterlik saýattylyǵy men tilderdi meńgerý deńgeıin arttyrý.
Joba jetekshisi, «Jastar qyzmetkerleri qoǵamdastyǵy» qoǵamdyq birlestiginiń ókili Aıgúl Abdýlınanyń aıtýynsha, úsh jyldyq joba aıasynda volonterlik uıymdar men bastamashyl toptarǵa kem degende 90 shaǵyn grant bólinbek.
«2024 jylǵa deıin biz konkýrstyq negizde jyl saıyn 30 shaǵyn grantty júzege asyratyn bolamyz. Mólsheri kem degende 300 myń teńgeni quraıtyn granttyq qarajat bilim berý salasyndaǵy áleýmettik máselelerdi sheshýge baǵyttalǵan bastamalardy iske asyrý maqsattaryna beriletin bolady. Bul shet tilin úırený kýrstaryn uıymdastyrý, sandyq nemese qarjylyq saýattylyqty arttyrý sııaqty jobalar bolýy múmkin. Shaǵyn granttardy júzege asyrýshylar óz kómegin tegin kórsetetin bolady», dedi ol jobany tanystyrý barysynda.
Budan bólek, «Birgemiz Bilim» jalpyulttyq jobasyn iske asyrý aıasynda qazaqstandyqtardyń bilim berý salasynda nege muqtaj ekendigi anyqtalyp, olardyń sıfrlyq, qarjylyq, kompıýterlik saýattylyǵyn arttyrýǵa arnalǵan oqytýdy uıymdastyrý maqsatynda volonterler daıarlanady. Sondaı-aq úsh jyldyń qorytyndysy boıynsha analıtıkalyq baıandama ázirlenedi dep josparlanyp otyr.
Aıta ketsek, «Birgemiz Bilim» jobasy 2024 jyldyń sońynda aıaqtalmaq.
