Kosta-Rıkadaǵy prezıdent saılaýynda Lýıs Gılermo Solıs jeńiske jetti

Kosta-Rıka memleketinde ótken prezıdent saılaýynyń alǵashqy qorytyndysy boıynsha «Azamattyq qozǵalys» partııasynan usynylǵan Lýıs Gılermo Solıstiń jeńiske jetkeni belgili boldy. Bul týraly ITAR-TASS habarlady. Joǵarǵy saılaý trıbýnalynyń aqparyna júginsek, L.Solısti saılaýshylardyń 77,69 paıyzy qoldap, daýys bergen. Onyń qarsylasy, basqarýshy «Ulttyq azattyq» partııasynyń kandıdaty Djonnı Araııa 22,31 paıyz daýys jınady. Saılaýdyń birinshi týry 2 aqpanda ótken edi. Ol kezde L.Solıske saılaýshylardyń 30,9, al D.Araııaǵa 29,6 paıyzy jaqtap, daýys berdi. Jalpy, bul saılaýda jeńiske jetý úshin daýys sany 40 paıyzdan asýy tıis. Naýryzdyń basynda D.Araııa saılaý aldyndaǵy naýqanyn merzimnen buryn toqtatýǵa sheshim qabyldady. Mundaı oqıǵa el tarıhynda tuńǵysh ret oryn aldy. Bul sheshimin saıasatker qarsylasynyń edáýir basymdylyǵymen túsindirgen bolatyn. Osylaısha, D.Araııa saılaýdyń ekinshi týrynda jeńilisin moıyndap, Joǵarǵy saılaý trıbýnaly shyǵarǵan qorytyndymen tolyq kelisetinin jetkizdi. Endi saılaý komıssııasy qorytyndyny maquldaǵannan keıin L.Solıs Kosta-Rıka memleketiniń basshysy atanady. Ol bul qyzmetti 8 mamyrdan bastap 2018 jylǵa deıin atqaratyn bolady. Aıdar О́risbaev. Derekkóz: Itar-tass.com. Foto: Ap.org.