«2022 jylǵy 6 sáýirde AQSh Reseıdiń eki bankine – «Sberbank» JAQ jáne «Alfa-Bank» AQ-ǵa qatysty sanksııalardy keńeıtti. AQSh Qarjy mınıstrligi Sheteldik aktıvterdi baqylaý basqarmasynyń (OFAC) sheshimimen bul bankter jáne olardyń enshiles uıymdary, onyń ishinde Qazaqstanda ornalasqan uıymdary SDN (Specially Designated Nationals) tizimine engizildi. Onyń nátıjesinde AQSh qarjylyq mekemelerin qosa alǵanda, AQSh ıeligindegi nemese AQSh tulǵalary baqylaýyndaǵy, nemese AQSh ıýrısdıksııasy shegindegi barlyq menshik jáne menshiktegi múddeler buǵattalady jáne olar týraly OFAC-qa habarlaý qajet», dep jazdy agenttiktiń Syrtqy kommýnıkasııalar basqarmasy.
Vedomstvonyń málimeti boıynsha, bir nemese birneshe buǵatqalǵan adamǵa tikeleı nemese janama, jeke nemese jıyntyǵynda, 50 nemese odan kóp paıyzǵa tıesili kez kelgen adamnyń búkil múlki jáne múliktegi úlesteri de buǵaqtalady.
«Tıisinshe, AQSh tulǵalaryna, onyń ishinde AQSh qarjylyq mekemelerine, eger bul uıymdar OFAC-tan bosatylmasa nemese ýákilettik berilmese, olarmen operasııalar jasaýyna tyıym salynǵan. OFAC Alfa-Bankpen 2022 jylǵy 6 mamyrǵa deıin, Sberbankpen 2022 jylǵy 13 sáýirge deıin mámileler aıaqtaý merzimin belgiledi. Bul eki banktiń klıentterine AQSh dollarymen tólemdermen jáne aýdarymdarmen operasııalar qoljetimsiz bolady. Bul rette klıentter ulttyq valıýtadaǵy bankishilik operasııalardy qandaı da bolmasyn shekteýsiz júzege asyra alady», delingen túsindirmede.
Agenttik mamandarynyń jazýynsha, «Alfa-Bankke» qatysty engizilgen sanksııalar birqatar ýaqytsha shekteýlerge ákelgen.
«Bank jeke jáne zańdy tulǵalar úshin AQSh dollaryndaǵy jáne eýrodaǵy aýdarymdardy toqtata turdy. Budan basqa, jeke jáne zańdy tulǵalar úshin bankomattar men POS termınaldardyń menshikti jelisinen tys Visa jáne MasterCard kartalarynyń jumysy toqtatyla turdy.
Alfa-Bank ýaqytsha jeke jáne zańdy tulǵalar úshin qolma-qol aqsha alýǵa jáne aýdarym jasaýǵa lımıtter engizdi, kredıtter berýdi toqtatty. Alfa-Bankti qospaǵanda, basqa bankterdiń kartalarymen zańdy tulǵalar úshin POS-termınaldardaǵy tólemderdi qabyldaý toqtatyldy.
Bul rette klıentter bankomattardan qolma-qol aqsha alyp, jedel tólem júıesine (JTJ-ne) qatysýshy bankterge telefon nómiri boıynsha mobıldik qosymshadaǵy aqshany teńgemen jáne táýliktik lımıt sheginde basqa bankterge shot derektemelerin aýdara alady. Kommýnaldyq qyzmetter, uıaly baılanys jáne basqa da qyzmetter úshin tólemder táýliktik lımıt sheńberinde shtattyq rejımde ótedi», dep jazady agenttik saıty.
Qarjy naryǵyn retteý jáne damytý agenttiginiń baspasóz qyzmeti Reseıdiń enshiles bankteri klıentter aldyndaǵy mindettemelerin ýaqtyly jáne tolyq kólemde oryndaıtynyn atap ótken.
«Onyń ishinde salymdarǵa, kredıtterge qyzmet kórsetý, sondaı-aq aqsha qarajatyn qabyldaý jáne berý. Bul bankter depozıtterge mindetti kepildik berý júıesiniń qatysýshylary bolyp tabylady, bul azamattar qarajatynyń saqtalýyna kepildik beredi. Reseıdiń enshiles bankterine qatysty engizilgen sanksııalar men shekteýler Qazaqstan bankteriniń qyzmetine baılanysty emes jáne olarǵa áser etpeıdi. Qazaqstannyń bank sektory kapıtaldyń jáne ótimdiliktiń eleýli qoryna ıe – 16 trln teńge nemese aktıvterdiń 42,3%-y. Bul bankterge aǵymdaǵy syrtqy ekonomıkalyq kúızelisterdi sińirýge múmkindik beredi. Aǵymdaǵy jyldyń basynan beri bankterdiń jıyntyq aktıvteri 148 mlrd teńgege nemese 37,8 trln teńge kórsetkishine deıin 0,4%-ǵa ósti. Menshikti kapıtal 96 mlrd teńgege nemese 2,1%-ǵa ósip, 4,6 trln teńgeni qurady», - dep jazady agenttik amandary. QR Qarjy naryǵyn retteý jáne damytý agenttigi bank sektoryndaǵy ahýaldy kúndelikti monıtorıngileýdi júzege asyryp otyrǵanyn eske salady. «Agenttik qajet bolǵan jaǵdaıda, syrtqy ekonomıkalyq táýekelderdiń qarjy naryǵynyń turaqtylyǵyna yqpalyn álsiretý úshin qajetti sharalar qabyldaıdy», dep jazylǵan vedomstvonyń resmı saıtynda.
