Vedomstvonyń baspasóz qyzmeti izdeý jumystary Jambyl, Qyzylorda jáne Almaty oblystarynyń aýmaǵyn qamtyǵanyn, onyń ishinde Berdishovtiń týystarymen birlese úzdiksiz izdeý is-sharalary júrgizilgenin aıtty.
Sarbazdyń memlekettik shekarany kesip ótken-ótpegendigin tekserý úshin Qyrǵyzstannyń shekara vedomstvosy da habardar etilgen.
«9 sáýirde Qyrǵyz Respýblıkasynyń shekarashylary shekara syzyǵynan 2 shaqyrym jerde qalǵan áskerı kıim úlgisiniń elementteri tabylǵany týraly habarlady. Kelesi kúni ShQ Jambyl oblysy boıynsha departamentiniń bastamasymen tabylǵan zattardyń ornyn qaraý úshin shekara ókildigimen kezdesý uıymdastyrylyp, onyń barysynda U.A.Berdishovtiń máıiti tabyldy. Atalǵan fakt boıynsha Qyrǵyz Respýblıkasy Shý oblysy Panfılov aýdanynyń AIIB tergeý is-sharalaryn bastady. Aldyn ala dıagnozy: mehanıkalyq asfıksııa, zorlyq-zombylyq áreket belgileri joq», delingen habarlamada.
Aıta keteıik, búgin, 11 sáýirde Shekara qyzmeti sarbazdyń máıitin ata-anasynyń turǵylyqty jeri boıynsha Qyzylorda oblysyna jetkizip beretinin málimdedi.
